قصة بالدارجة المغربية : الخاتم المسحور
 |
| قصص بالدارجة المغربية الخاتم المسحور |
العنوان عندو معانى بزاف وكاينين قصص كتيرة
على الناس الي تيديرو السحر من النساء والرجال لاغراض معينة و باش يضرو بيها ناس
اخرين، مثلا المرا تتسحر لراجلها الراجل يسحر لمراتو، الام باش تبعد والدها من
شي وحدة هوا تيبغيها، الراجل يسحر لصاحبو
باش يطلق مراتو ...
يقول الله تعالى
"فيتعلمون منهما مايفرقون
به بين المرء وزوجه"
هادشي كامل الي غادي تشوفوه فهاد القصة واقعي
وحقيقي واخا هو قريب للخيال حيت ممجربوش و نتمنى حتى واحد مايجربو.
قبل ما نبدأ القصة بغيت نقولكم الساحر كيفاش
تيولي ساحر اولا خاصو يكون عنيد وعندو اصرار ومتكونش عندو الحشمة والضمير ومعندوش
احساس رحمة ولا شفقة ويكون عدو لكل الاديان ويكون مستعد انه يدير اى جريمة و يكون
بحال الزبالة حاشاكوم، يعنى حوايجو ديما موسخين و يتحرم على جسمو الماء والصابون
وتكون ريحتو خانزة ديما، ديك الساعة غادي يقدر يشوف المخلوق الى لعنو الله الي هو
الشيطان، اولا خاصو يكونو عندو كتب ديال
سحر غالية و يخرج بليل يمشي لشي بلاصة مهجورة دار ولا خربة او فيها زبالة
او حمام المهم يمشي لشي بلاصة الي يكون فيها الشيطان، ويبدأ يحيد حوايجو كلهم
ويرسم دائرة و يرسم فوسطها واحد الطلاسم و اسماء الشياطين ويجيب اي حاجة فضة
ويشوهها ويوسخها ويحطها فى وسط الدائرة ويجيب نوع خاص ديال الحبوب ويحطو فوسط شي طبسيل ولا شي حاجة و يتحنى فوسط
الدائرة ويبدأ ينغني بشي اسماء ديال بعض الشياطين دابا ولى ساحـــــــــــــر
و(كفر بالله)
يحكي محمد و يقول:
انا محمد 24 سنة موظف فى شركة سياحة بعد ما
ساليت قرايتي بغيت واحد البنت من عندنا فى
الشركة سميتها سارة دوزنا قصة حب طويلة بزاف حتى قررت انني نمشي نخطبها، ولكن خلاص
ضروري كان خاصني نتشاور مع عائلتى، فالاول استغليت الفرصة فاش كانت مجموعة العائلة
كلها وقولتلهم انا قررت نخطب، كلشي فرح وماما فرحات بزاف وقالولى مبروك لكن مرات
خالى قالتلي انا تنصحك تزيد تسنى شوية،
بابا قالها علاش راه عندو 24 سنة راه خاصو يتزوج باراكة عليه، قالتلو اه وانت شحال هادي باش تتعرف هاد
البنت قولتلها اه ومن بعد انا هو الي
تنقرر، واحد الشوية ناضة و خلات الجلسة ماما قالتلي واقيلا تقلقات حيت كانت باغياك
لبنتها مروى قولتلها انا اصلا متنفكرش فبنت خالي يا ماما قالتلي المهم مبروك ا
ولدي وفوقاش غادي نمشيو نخطبهالك قولتلها ان شاء الله نهار الخميس الجاي قالتلي
مبروك، جلست انا تنوجد راسي وكنت فرحان بزاف..
جا نهار الخميس أصلا احنا كنا غادين باش نتعرف على دار العروسة،
ومضات معايا العائلة كاملة وصلنا لدار سارة وكانت الناس كلها فرحانا الصراحة الناس
استقابلونا مزيان هدرت مع الأب ديال سارة كانو ناس ضريفين بزاف، الأب
ديال سارة وافق الحمدلله،و لكن الى بان ليا هو ان مرات خالي ناضت و جرات
سارة لجنب قالتلها لبسي هاد الخاتم بغيت نشوفو كي غادي يجي معاك، سارة لبستو
قالتلها هادا كادو من عندي، الخاتم انا كانت بالنسبالي شي حاجة زوينة من مرات
خالي, داز النهار على خير و بالليل سارة اتصلت بيا وكانت فرحانة بزاف، شحال و حنا تنهدرو و هي تقولي سارة متتقلقيش
مني ولكن الخاتم الى جابتولي مرات خالك
ممعجينيش مكتوب عليه شي حروف مخربقة و مامفهوماش قولتلها مزيان انها جابتو كتر خيرها قالتلى اويلي فين مشى
الخاتم انا عاد كنت حاطاه حدايا ضحكت وقولتليها واقيلا جات وخداتو من، واحد الشوية
صوت سارة اتقطع قولتلها سارة سارة أفين مشيتي جاوبيني ا خبيبة ولكن والو متنسمع تا
حاجة قطعت و عاوتاني صونيت والو مكتجاوبش، وانا نصوني على باها ديك ساعة راه كان
مشى الحال، جاوب وقالب مالك اولدي محمد قلتليه سمحيلي اعمي ولكن راني كنت تنهدر مع
سارة ومبقاتش تتجاوب قالي راها فبيتها بلاتي خليك معايا شوية و انا صوتو تيقول
سارة سارة نوضي ا بنتي وسمعت صوت امها
تتغوت انا اتخلعت جريت لبست حوايجي ونزلت مشيت عندهم للدار تندق تندق ووالو متجاوب
تا واحد و هوما جيران خرجو عندي قالولي
راه داوها لكلينيك و مشيت عندهم لقيت اب
سارة وامها وناس من عائلتها قولتلهم آش واقع ياك لاباس باباها قال معرفش لقتها
طايحة فالارض يديها تيسيل منهم بزاف ديال
الدم وصوبعها زورق بزاف و المصيبة ان الدكاترة كلهم ما عارفيشن شنو عندها، دخلت
الغرفة الى هى فيها لقيت تحت عنيها كوحل بحال امضروبة وصوبعها زورق و قولت للطبيب
دير شي حاجة قالي مازال معرفناش شنو عندها قولتلو علاش انتوما بالسلامة شنو تديرو
هنا قال راه كاينين ناس متخصصين اكتر مننا سيرو ديوها عندهم لشي مستشفى اخر جلسنا
تندورو بيها على المستشفيات و الكلينيك كاملين و لكن والو تا واحد معرف شنو عندها
لكن واحد الطبيب قال لينا جيبولها شي فقيه ديناها للدار وباها جابلها واحد الفقيه اسمو شيخ القراء قرا
عليها فاقت لكن فاقت وحدة اخرى بدات تتكسر اي حاجة قدامها وبدات تتقمش فراسها سارة
ولات واحدة اخرى الفقيه ما معرفش مايدير معاها.
الجزء الثاني:
وامها واباها بقاو تيبكيو حداها فاش فاقت
قالت اشنو وقع و شكون الي قمشني بحال هكا اويلي محمد انت هنا احبيبى وهى تتكلمنى
بقات فيا بزاف وكنت باغي نبكي و لكن مقديتش مبغيتش نبين ليها راه كاينة شي حاجة
قالت مالكم تتشوفو فيا بحال هاكا قولتلها سارة عقلتي فاش كنت تنهرد معاك فالتلفون
قالت اه قولتلها واش عاقلة شنو وقع هاديك الساعة قالتلى اه نعست مرة واحدة قولتلها
ما عقلتي على تا شي حاجة اخرى قالتلى لا قولتلها هاكي هاد القران اقراي فيه وهي
تغوت عليا بعد مني مابغيتكش قولتلها علاش مبغيتينيش قالتلى ماكانبغيكش اباها قالها
اشنو كتقولي اسارة سكتت شوية وقالتلو اشنو قلتي ابابا كان شي واحد تيسولني واش
عاقلة على شي حاجة وقولتلو لا، قولتلها
ولكن انا قولتلك اقراءى فى القران قالتلى شنو مسمعتش قولتلك اقراءى فالقران قالتلى
غوت راني ماسامعة والو وقلت بالغوات وا قراي القران واش تصمكتي قالت امها اويلي
البنت اشنو وقع ليها قالتلها اماما هاني مابيا والو قولتلها كيفاش زعما سمعتى
ماماك قالتلى حيت كلامها واضح انا بقيت تالف ماعرفت شنو ندير قولت لاباها جيب ليها
شي فقيه اخر قالى دابا نشوف اولدي و مشيت من عندهم ومشيت للدار و باقي مقلق دخلت لبيتي عيطت على امي قولتلها كان هنا
تيشيرت لبارح فوق الفراش انتى غسلتية قالتلى لا مغسلتش قولتلها ايوا فين مشى
قالتلى معرفش قولتلها صافي غادي نلبس اى حاجة .
الجزء الثالث
المهم نعست بالصدفة لقيت جنبي المراية الى فى
البيت ديالي بحال ايلا مشقوقة و الباب
ديال البيت ديالي مسدودة انا ماشيف والو ولكن سامع شي صوت وهوا تيتسد بالشوية وراء
الباب انا شفت شي حاجة طويلة عاطياني
بالضهر انا قولت يمكن هدى تكون الحوايج الى انا معلقها وراء الباب ولكن هدا شي حد
واقف انا الصراحة خفت نحط يدي نشعل الضو جلست و قرمزت على الفراش وحاولت ندقق
مزيان لقيت شي راس تتهز و تتحط بالزربة
صافي شداتني الخلعة ديال بصح رجعت نعست وتغطيت ووغطيت وجهي و حسيت بشي حاجة تتجبد
الغطاء وفعلا الغطاء بدا تيتجبد بشوية و انا تنحاول نجبد ولكن والو بدون فائدة الغطاء كله اتجبد ونزل على الارض نضت
بالزربة وشعلت الضو لكن الضوء ماتشعلش حسيت بهواء ورايا "بسم الله الرحمن
الرحيم اللهم اجعل بيننا وبينهم سدا اللهم انى اعوذ بك من همزات
الشياطين"مابقيتش خايف نشوف ورايا انا قدامى الباب ماغاديش نرجع للور وغادي نجري على الباب نحلو فعلا جريت على الباب
وانا نجري زطمت على حاجة معرفش شنو هى لكن حسيت بيه شي جسم، طحت على الارض
ونضت وجريت على برة وشعلت الضو الى برة جبت المصحف وبقيت تنقرى فيه الليل كامل
، هادشي الي شفتو راه بزاف ولا يمكن اتعديت من سارة ولا اشنو التيليفون تيصوني
الأب ديال سارة تيتصل سبحان الله عاد كنت تنفكر فيها اباها قالي تعالى عندي اولدي
للدار
مشيت عندها للدار وانا طالع فالدروج سمعت صوت
سارة وهى تتغوت دقيت اباها حل ليا الباب دخلت قالي شوف ا محمد اولدي كل حاجة وليها نهاية وسارة دابا مابقتش
سارة ولات وحدة اخرى قولتلو كيفاش من بعد هادشي كامل نسمح فيها لا طبعا، لقيت سارة خرجت من الكوزينة و رجليها
مقيساش الارض ودخلت للحمام قولتلو ياعمى
ياك سارة قولتلى فى البيت ايوا شكون الى دخلة الحمام ، شاف مورايا وقالي فين ا
ولدي الحمام ضالم و اصلا حالتها متسمحش انها تنزل من الفراش قولتلو والله ايلا
دخلت الحمام وشافت فيا قالى تعالى معاية اباها فتحلى باب الحمام قالى شوف ماكاين
حد تعالى معايا بغيت نوريك واحد الحاجة
فتح باب البيت لقيت سارة ناعسة وماماها جالسة جنبها قالى شفت، انا بقيت تنقول
لراسي واش حماقيت ولا شنو اب سارة قالي
انت بنتي ليا عيان ا محمد قولتلو لا انا
مزيان والدة سارة ناضة من على الفراش وقربت منى وقالت لي يا محمد سارة فاش
تتكون فحالتها تتبقى تعيط عليك قولتلها هى
كترجع لحالتها قالت اه فاش تنرشو عليها الماء مقروء عليه قران قولتلها اوكي فوقيها
انا مكونتش محتاج نقول هاد الكلمة لانى لقيت سارة فاقت مرة واحدة وشدات شعرها
وتتاكل فيديها بحال الي تتاكل ا لحم
وتتعضو بسنانها وكان شعرها كيتقطع امها
شدات ياديها وحاولت تسيطر عليها ناضت وجراتها وطاحت فى الارض انا جريت باش نشدهت
لكنها شدات الى امها كانت بتقشر بيها الليمون وحطتها على رقبتها ماقديتش حتى نشد
ليها اديها سارة كانت تتشوف فيا والدموع
فى عنيها كانت تقريبا سارة رجعت لحالتها قولتلها سارة انتى تتسمعيني اري الموس
وبقات تتبكي قولتلها ياسارة هارى الموس
سارة دوزات الموس على رقبتها ودمها طار ليا على وجهي، دم سارة حببتى والى كانت
غادي تولي مراتى انا بعد هاد المنظر طحت على الارض من كترة الصدمة ومابقيت سامع
والو باقي عاقل كنت تنشوف فيها وهى روحها تتطلع وحتى هي تتشوف فيا حتى لاخر نفس
فيها ...
الجزء الرابع
سارة ماتت
احسن حاجة فى حياتى ماتت قدامى ودمها نشف على حوايجي انا كنت جالس فى
العزاء ما حاس بوالو و جالس تنفكر فيها فاش سالا العزاء اب سارة جا وقالى خود يا
محمد الخاتم ديال سارة حبيبتك الى عطاتو ليها مرات خالك قولتلو اشنو ندير بيه قال
انا الى شنو ندير بيه يمكن يفكرك بيها فعلا خدت الخاتم كنت جالس تنفكر علاش هادشي
وقع غير فاش قررت نخطبها أكيد شي وا حد
دار ليها شي حاجة ولكن شكون ،وبعد مرور الايام جاتني واحد الفترة كنت ماشي
طبيعى كنت كنشرب الما غير بسيف وتنعس بزاف حتى فى الخدمة وتنسى بزاف وكنتكلم وانا
ناعس وكنت كنشوف ناس تيشبهولي فى الدار طلبت من بابا يديني عند شيخ طبعا بابا دار
بية عند بزاف د الفقهاء ولكن بلا فائدة الناس لاحظة الموضوع مرات خالى قالتلى تعالى
معايا انا نديك لواحد يعالجك قولتلها بصح قالتلى بصح البس حوايجك وتعالى معاية
لبسة حوايجي ونزلت معاها مشينا لواحد لبلاصة
فحي (..) بلاصة فيها غير الديور القدام وبقينا تندخلو فى شوارع عل يمين
ليسر حتى وصلنا لبيت قديم طلعنا فى الطبقة
الاولى فتحلنا واحد اعور بعين وعين ولابس رزة على راسو انا تخلعت من شكلة بصراحة
مرات خالى قالتلى هدا الفقيه المعطي بقيت تنقول فراسي هدا فقيه كيفاش يكون هدا
منظر فقيه قالنا دخلو دخلنا دارو عبارة عن مزبالة حوايج مرمية فى كل بلاصة والحيوط
مشققة والبيت رائحتو خانزة و عامر حشرات المهم قعدت مرات عمى قالتلى قول للفقيه
عادتلو كل حاجة قال انت شي واحد داير ليك شي حاجة قولتلو وايلي وعرفتها بوحدك مرات
خالى قالتلى عيب ا محمد قالي الىي داير ليك هادشي واحد صحبك اسميتو عادل اه عادل
صحبى يدير هادشي مايمكنش وفعلا عندي صاحبي
عادل صديقى من الطفولة كيفاش قولتلو انت متأكد قالى متأكد مرات خالى قالتلى طبعا
هوا منين غادي يعرف صاحبك انا فعلا طلع
ليا الدم وكنت ناوى نقتل عادل قالى انا
غادي نخرج منك هادشي الى فيك مستعد قولتلو مستعد ابدأ بدا يرسم رسومات على الارض
ورسم دائرة وقالى تعالى اوقف فوسط الدائرة وقفت فوسط الدائرة وبقا تيقرى شي كلام
غريب وقالى قول ورايا بسم كاض ورغ ا.س.ث.ث وعضلبين فاليأتو المتخفيين من بعدهما
راقدون سائرون انا الى لاحظتو هو مرات خالى الى تتغوت وتقول لا ابعدو مني ابعدو
مني لقيت السقف ديال الدار ولا كحل رشي حاجة فيه تتمشي و تجي قدامى هادشي كامل خارج الدائرة المعطي قالى غمض
عنيك ومتفتحهاش والا غادي تتحرق ومتخرجش برى الدائرة بقيت تنسمع كل اصوات الناس
الي كنعارفها بابا وماما خالتى عمى مرات خالى حتى سارة اصوتهم كدور عليا شوية
حاسيت ان الارض تتصرطني وتنزل لتحت حولت نفتح عينى المعطي قالى عنداك تفكر تفتحها
والا غادي تتحرق قولتلو علاش قال قرينك موراك يامحمد قرينك موراك عنداك دور عنداك
تشوف فعني شاف فى الارض وفتح عنيك فتحت
عينى لقيت الارض من تحتى تدور بيا وبدأ الخاتم الى عطاهلي اب سارة يسخن فيدي وحسيت
ان صحتي تقالت عليا وانا نسمعو قال العفو العفو العفو اسيدنا كل حاجة وقفت قالي
فيق مرات خالك وسير بحالك...
الجزء الخامس
مرات خالى كانت فاقدة الوعى قولتلو صافي دابا
قال صافي حيد الرزة و قطع خصلة من شعرو
الطويل بزاف وحرقها و مسح بيها وجهي فيقت مرات خالى وخديتها ومشينا ولكن قبل ما
نمشى قالى انت غادي تتأذى فى كل الحالات انا ممكن نكون بعدتهم عليك شوية لكن ماشي
فمرة قولتلو انا ممسوق لتا شي حاجة قالى انت ماباغيش تنتاقم من الى قتل خطبتك قولتلو انت عرفت منين بالي انى
خاطب لقيتو سرط لسانو وبدا يدخل و يخرج فالهدرة وقالى انا ساحر كنعرف كل حاجة خرج
ليا شي حوايج بحال الضفار قولتلو شنو هادشي قال ليا اظافر قطة ديها ارميها على
ظهرو وهوا غادي قولتلو واخا خدتها واتصلت بيه فين اخويا عادل انا باغي نشوفك دابا
ضروري قالى واخا ساعة ونكون عندك تسنيتو لقيت عادل جى ضاحك بحالا مداير والو وماشي
هو السبب فى موت خطبتى قولتلو كيداير يا عادل قال بخير البقاء لله فى خطبتك ا محمد
والله تقلقت بزاف قولتلو تقلقت عليها بصح قال طبعا ا محمد الله يكون فى عوانك
قولتلو تعالى نتمشاو شوية ا عادل انا كنت حريص على ان عادل يكون سابقنى بشحال من
خطوة باش نرمي عليه الاظافر على ظهرو وبقيت تنرمي وحد ورا التانية و التالتة لحد
ما هوا بقى يلاخظ وشاف ايدى قالى شنو تترمي شاف فى الارض شاف الاظافر نزل باش
يجبدها قبل ما يهز راسو كنت نزلت عليه بالحجرة على رايو وجريت معرفش علاش درت
هادشي ولكن حسيت انى ارتاحيت وحسيت انى انتقمت لسارة مشيت للدار ماكان حتى واحد جلست ايدى كان فيها دم باش ضربت عادل غسلت
ايدى وخرجت نشفت ايدى وانا غادي لصالة شفت فركن من الاركان لقيت عادل جالس ونص
وجهو غرقان دم مابقيتش عارف واش هادشي
حقيقى قولتلو انت اشنو الى جابك هنا ابتسم ولقيتو اختفى ولقيت نقطة دم نزلت
على يدى ولقيت نقطة اخرى نزلت هزيت راسي على السقف لقيت السقف عامر دم الضو تقطع
ومازال الدم تينزل عليا انا مابقيت شايف تا حاجة و لكن سامع صوت تيجي من البيت الى
وراية عارفين صوت العود و هو تيتمشى هاد الصوت تنسمعو بحال ايلا شي
عود تيجري لداخل فالبيت...
الجزء السادس قبل الأخير
شعلت شمعة لقيت واحد تيشبهلي بالظبط واقف على
الكرسى عينو بحال عين الافعى هدا القرين ديالي اه انا تنسمع ان القرين شبة الانسان
الي معاي تيشبهلي ولكن عينو لقيتها تتحرك وفمو باغي يقول
شي حاجة انا دقات قلبى بدات تتزرب من الخوف قولتلو اشنو باغي منى لقيت واحد
اخر تيشبه لعادل واقف حداه ورقبتو طويلة تتلوى بحال شي حنش تخيل هاد المنضر بقيت
تنرمي عليهم اى حاجة تنلقاها وتنقولهم اشنو بغيتو منى بعدو مني وهما غير تيزيدو
يقربو مني لقيت باب دار تفتح هزيت الكرسى رميتو على الباب سمعت الغوات رجع الضو
لقيت مرات خالى طايحة فى الارض الكرسى باش شيرت جاها فراسها اش هاد المصيبة يارب
الجيران تجمعوا قولتلهم راه غير زلقات وطاحت اتصلو بالاسعاف جزت خداتها نزلت مشيت
عند الفقيه دالزمر الي سميتو المعطي فتحلى الباب قولتلو ابنادم انت داويتيني و
كيفاش انا مازال تنشوف ناس تيشبهولي قالي راني قولتلك ماغاديش طول قولتلو شنو
داكشي الي واقف فوق راسك قال انت كتشفهم قولتلو كاينة شي حاجة عندها جنحين واقفة
على راسك و قولتلو انا شنو هادشي الي تيطرا ليا يارب ضربت الطبلة برجلى الحوايج
الى فوقها طاحت ولكن مكنتش كنتوقع انى نلقى التيشيرت نتاعى الى انا ملقتوش قولتلو
هدا شنو تيدير عندك هنا قالى هدا قطر قولتلو كيفاش قطر قال باش يتعمل علي سحر
قولتلو شكون الى جبولك شاف فيا وسكت قولتلو جاوبني قال مرات خالك كانت تتسحر ليك باش تتجوز بنتها
قولتلو وعلاش قولتلى عادل الى دار هادشي قال مرات خالك الى قالتلى وفاش جابتك ليا
هنا كان باش نسلط عليك قرينك قولتلو يعنى كذبت عليا قال مرات خالك هى الى كذبت
ومكانتش عارفة بالي القضية غادي توصل لموت خطيبتك انا صافي اتجننت وبقيت تنضرب فيه
حتى سخف مشيت نيشان لمستشفى الى فيها مرات
خالى..
الجزء الأخير :
دخلت بحال الحمق قولتلهم باغي نشوفها بابا قالي مالك قولتلو باغي نوشفها قالي
راها تتموت قولتلو واخا هاكداك نشفها قالي
واخا ساينى ندخل معاك قولتلو واخا دخل معايا كانت تقريبا تتطلع ليها الروح قولتلها
حرام عليكي ضيعتي راسك انتى كيفاش غادي تقابلي مع الله هي تتشوف فيا ولكن مقاداش
ترد قولتلها صافي واحد الشوية وغادي دخلي القبر كيفاش غادي تقابليه قتلتيلي احسن
حاجة فحياتى علاش بقات تهز فراسها وقالتلي امك هى الي عطاتني حوايجك باش متتجوزش
سارة بابا سمع هاد الكلام وقال اشنو تتقولى قولتلها حتى وانتي تتموتي وتتكذبي قالت انا غادي نموت ولكن هادي الحاجة الوحيدة الي درتها مزيانة قولتلك
الصراحة وماتت مرات خالي من بعد هاد
الكلمة بايا خرج راسو فى الارض وانا خرجت وراه قولت لماما علاش قالتلي كنت
عرفا انها غادي تقولك ولكن والله انا كان قصدى منآديكش كنت باغياك تتجوز من
العائلة قولتلها انا دابا ضعت ماغلدي نتجوز من العائلة ولا من غير العائلة ضيعتوني
حرام عليكم التلفون ديالي صونا سيمو صاحبى تيتصل رديت قالى يا محمد البوليس تيدورو
عليك انت مشتبه فيك انك قتلت عادل قولتلو انا فعلا قتلتو سديت التليفون جاو
البوليس للمستشفى قبل ما يشدوني جبدت الخاتم وقولت لماما هدا هو السباب ديال السحر الي قضى علينا حطيت الخاتم على الارض
وزطمت عليه هرستو وتشديت وكنت تنشوف فالوجوه ديال عائلتي واصحابي واب سارة وتنتفكر
كل لحظة دوينة عشتها كنت تنقلب فيهم على سارة لكنها سبقتني عند خالق الخلق وقد
تكون هده اخر كلماتي فى رسالتي قبل مواجهت حكم الاعدام يا من تستعينون بالسحر
افيقو من خلقك نهاك عنة وعدوك ابليس يجعلك تستعين به فلن يأتى العدو بخير ما دام
عدو لا تستعن به بل استعن بخالقك وخالق عدوك وخالق الخلق اجمعين ارجع لربك ارجعل قبل مقابلته اجعل قلبك مشتاق اليه
النهــــــــــــــــــــــاية
