قصة بالدارجة سارة - الجزء الأول

قصة بالدارجة المغربية سارة - الجزء الأول

قصة بالدارجة سارة

أنا سارة بحالي بحال بزاف د لبنات مغربيات.... ماغنقولش من إنى مدينة حيت بحال النوع ديالي كاين فكل مدينة ...
تقدي تكوني انتي ليكتقراي دابا بحالي او كنت فيوم من الايام بحالي...
عاجبني
راسي بزاف حيت عارفه راسي زوينة ... ها طولة و لاتاي ها شعر طويل و زعر بشرتي بيضة و عينيا كبار و عسلين ...
لي يشوفني مايقدرش يحيد عينيه عليا و هادشي كيزيد فلغرور ديالي
مكنسوقش لهدرة د ناس و كنلبس لي بغيت لمهم نكون متبعه لا مامود...
اما واليديا ماشي شغلهوم فيا ... ندير لي بغيت أنا حرة ... وكنتعطل برا بسباب صداع ديالهم غير ندخل يبداو(ستري راسك... را كبرتي... ديري عقلك... براكه من دوران...)
اوووه مابغاوش يخليوني نعيش حياتي و هما كلما زادو كيعايروني انا كنزيد فلفهامة ديالي...
برغم من الدوران و السهيير و تصاحيب من هاد الدري لاخور ... أول حاجه مكنخلي حد يقربلي و ثاني حاجة ديما متفوقه فدراستي و هادشي لكيسكت واليديا...
بغيتو تعرفو علاش وليت هاكه ؟ كبرت و انا عايشه و خايفة واليديا يطلقو كانو ديما مدابزين و هادشي ليخلاهوم يتلاهاوم مع مشاكلهم وينساوني أنا... مي حتال كبرت أنا عاد عرفو راسهم كيبغيو بعدياتهم و راهم عايشين في سلام دابا... مي بالنسبة ليا كان فات لفوت ... و أخلاقي توسخو و هاد طريق لي بديت فيه ولفتو مانقدش نبدلو...
كان عمري 17 سنة ملي خديت لباك و قررت نقرا الهندسة ... و داكشي ليدرت الذكاء ديالي مخذلنيش و دازت 5 سنين ووليت مهندسة ادي دنيا كيما يقولو لمصريين... خاصني غير لخدمة
ماعجباتني تاشركة حيت ملتازمين و سكات ولملل انا من طبعي حيوية خاصني نشاط نخدم
و الاغنية د "jee ho" مطلوقة نتصنط ليها.. و بقيت كندور مبغيتش نخدم و انا عمري يالاه 22 عام بغيت نعيش حياتي و الشباب ديالي نكون ناشطة ماشطة...

 
2-
كانت عندي واحد صاحبتي طايرة من لمقلة كتر مني سميتها رجاء و هي ليقرباتني كتر من الحياة الليلية و سهير مع دراري وهما كيشربو و سكرانين انا كنت كنمشي معاها كيعجبلي غير نقز و نشطح مي حتال يقربلي شي دري لا
و كانواا ديما كيجيو "ذكور" كبار كيعردو عليا فلوس خيالية باش غير ندوز معاهم ليلة...
انا واخا كيما نقولو طايرة كنت عارفة هدوك "الذكور" ختارت هاد لكلمة حيت عيب نقول عليهوم رجال ... باغيين غير يفرغو لغريزة ديالهم و يلوحوني...
اما رجاء فلفلوس و طمع خرج عليها ... خسرات شرفها مع اول دري كانت كتبغيه و هي فعمرها 16 سنة غير خدا ليبغا مابقا دار بيها و قاليها كيما نعستي معايا تنعسي مع 10 غيري...داك الدري مكنش غالط ف من داك نهار و هي كل ليلة مع واحد وولات عارفة كيدير تختار لكليان ديالها و لخليجيين خاصة حيت هما غير يشوفو بنت صغيرة كيرميو لفلوس...
بصح انا عارفه قصة رجاء و شنو جرا لها مي هي صاحبتي من الليسي مكيهمنيش شنو كدير ...
كانو ليام كيدوزو عليا عادي لغوات فدار و سهرات و صواريات ماهمني تاحاجة و ضميري مكيأنبنيش بقيت هاكة حتال واحد ليلة بقيت سهرانة فواحد لعيد الميلاد حتال لفجر...
دخلت لدار كنتسلت كيدما و هو يخرج معايا بابا دربني بصقلة حتال طحت فلرض و بدا يعايرني ماخلا ماقالي...
جات ماما كتفكني باش ميقتلنيش بين يديه... هادي كانت أول مره بابا هز فيها يدو عليا و كانت أخير مرة كيهدر معايا...
أول مرة يأنبني ضميري على تصروفاتي طائشة و اخير ليلة نبات فدار...

3-

 فقت صباح و جسمي كلو ازرق وجهي منفوخ و حنكي زرق من ديك صقلة بقيت كنقاد حالتي و كنخبع ضربات لي فيا غير بلمكياج
و بقيت كنجمع لكسوة ديالي و جاع اغراضي ...
كتسألوا واش غنهرب ... لا منقدش حيت معندي فين نمشي ولا فلوس لينخرج بيهوم ...
لبارح من بعد ما بابا خرج يصلي لفجر جلسات معايا ماما و شبعات فيا معيور و فلاخير قالتلي بيلي بابا وجد لي فيزا باش نمشي لعند عمي ل أمريكا نعيش معاه و تما ندير ليبغيت أما لمغرب را كحلت ليهوم وجههم حدا لعائلة ... بنتهم لوحيدة ليعندهوم خذلاتهوم و دابا هما كيتخلاو عليها...
انا مبغيتش مي دابا معندي خيار... خديت حوايجي و مشيت وصلوني لمطار توادعت مع ماما بلبكا برغم شنو درت قلب الام ديما حنين... أما بابا مشيت نسلم عليه قلب وجهو و باعد عليا مامشاو حتال تأكدو بيلي ركبت ف طائرة...
طائرة ليقطعت تيكيت ديالها ذهابا بدون اياب... طائرة لي ممكن تغير مصير حياتي...
و انا لفوق فسما ماجاليش نعاس كنفكر فشنو درت انا و خسرت الاسرة ديالي ... مي داك الضمير لي فاق بديك صقلة رجعتو ينعس ملي فكرت دابا نحقق احلامي كلها و ماكين ليحبسني "الحلم الامريكي" حلم كل شاب...
وصلت لأمريكا و ستقبلني عمي ومراتو مشينا لدار و نعست انا ديركت ...
ماسولونيش على اش وقع لوجهي ... يمكن عارفين لقصة كلها...
بقيت ايام غير فدار... بغيت حتال ترجع حيوية لوجه ديالي عاد نبدا فلحلم ديالي....

4- 

ليوم صبح نهار جديد و سارة لقديمة زوينة نشيطة رجعات لحيويتها لمعتادة و هاني غنمشي نكتشف لحلم ديالي و نشط فهاد لبلاد لي ديما ناشطة ...
لبست شورط دجين قصير و قميجة ف سومو كتبين ملابس داخلية ديالي صيف هادا و خاصني نحيح و فهاد لبلاد عادي نلبس هاكا قبل منخرج قالي عمي : بنتي انتي امانة خويا عندي و منبزز عليك تاحاجة مي خاصك تبداي تاخدي لمسؤلية و تخدمي انت غير قوليلي راكي قابلة و من سيمانة جاية غتبداي لخدمة ف شركة د صاحبي ... سمعيني انا عارفاكي قراية و مهندسة و طموحاتك كبيرة ... هاد الشركة من اكبر شركات للمهندسين هنا غاتكون بداية زوينة ليك مترفديش هاد الفرصة ... خرجي و فوجي وفكري مع راساتك غدا نستنا لجواب ديالك....
ماكونتش معولة نخدم من دابا بغيت نعيش حياتي مي منقدرش نرفض طلب ديالو و انا عايشة معاه دابا قررت نقبل لخدمة و نجمع لفلوس باش نسكن بوحدي
وداكشي ليكان لغد ليه جلست مع عمي و خبرتو بيلي انا قابلة نخدم و قالي نهار الاثنين نبدا اي مور غدا ... مشيت شريت لكسوة باش نبان بغوفيسيونال وخديت شلا حوائج معايا لينحتاج ولي مانحتاج ...
وصل نهار تنين مشينا انا و عمي تعرفت على صاحبو جون و دار معايا مقابلة وقالي خاصني ندوز ستاج و موراها نبدا لخدمة...
ولفت لخدمة دابا و ولفت لجو د هنا صباح خدمة و ليل سهير ماعندي تامشكيل دابا هادي 6 اشهر ملي جيت و ماما كنهدر معاها مرة فشهر اما بابا ... هاد لكلمة نسيت حتى كيفاش كتنطق ... فلول كنت كنسول عليه ماما مي ديما كتقولي ناعس...خدام... ولكن مع عمي ديما كيهدر معاه فهمت بيلي باقي ماسمحلي و حتى انا قلت نخليه مانسول جاع فيه ملي نساني...


5-

دوران ف شوارع و سهير مع لجور ولباس بحالهم ولا شي عادي هادشي كنت كنديرو حتى فبلادي مي طورات لمرحلة اخرى وكان...
ليوم نهار جديد فلخدمة و عندي مشروع مهم خاصني نخدم عليه مع واحد الشركة اخرى ... غادي نخدمو جروب باش نساليو فيساع و انا غنكون مديرة لمشروع بنسبة لشركة ليخدامة فيها و معايا جوج مساعدين ليهوما روبرت و مايك هوما اصدقاء ديالي بزاف وديما كنسهرو ب 3 ...
اما بالنسبة لشركة لوخرى فمدير لمشروع لي يالاه تعرفت عليه فسميتو جايكوب و معاه آنا و بيل ...
هاد جايكوب واعر معا راساتو لاطاي سبورتيف و لعينين زورق وتقول غير شي ممثل ... مي تصرفات ديالو معجبوليش جا سلم على دراري ليمعايا و انا خلاني معلقة يدي فسما كن لقيت كون قتلتو فديك لحظة و منين كيهدر و تقول واش يشوف فيا ... قهرني بتصروفاتو و انا الف واحد يتمنى غير نشوف فيه...
واحد النهار كنا خدامين ب 6 بينا و ملي وصل ليل مشاو مساعيدينا بقينا هير انا وياه خدامين فلول ماكنش باغي يجلس مي بززت عليه حيت عندنا لخدمة بزاف...
بقينا جالسين واحد شوية ناد و بانلي كايجبد السجادة (الصلاية) يصلي !! اها هادا مسلم ! كيدارلها ؟
ملي سالا جا بقا كيكمل خدمتو و انا نسولو (اكيد لحوار بالانجلزية انا نترجمولكوم هههه)
سارة : انت مسلم ؟؟
جايكوب : وي حمد لله
سارة : مي سميتيك...
جايكوب : انا من لول سميتي جايكوب مي ملي سلمت عرفت جايكووب و يعقوب واحد و مبدلتوش ....
سارة: اه مزيان ...
جايكوب: انت مغربية ياك
سارة؛: اه
جايكوب: مي لمغرب دولة مسلمة ولا لا ؟ و انت شنو ديانتك؟
سارة (سؤال كان بحال الصاعقة على سارة ماعرفت ماتقول خاصة هي و الاسلام لاعلاقة ...ردات عليه و هي متوترة) : اه حتى انا مسلمة

6- 

جايكوب: بصح؟ مي سمحيلي على لهدرة لينقول ... ملابسك هدرتك تصرفاتك لا تمت للاسلام بصلة
سارة (زادت توترات وتعصبات خاصة انو واحد جاوري كينتقدها ف الدين ديالها... و قررات تبدل لموضوع) : احمم كنضن حنا هنا على قبل لخدمة ماشي باش نهدرو على حياتي الشخصية
جايكوب (مصمم يكمل كلامو) : هادشي مكيتعلقش بحياتك الشخصية مي را كتعطي طابع سيء على دينك خاصة فهاد لبلاد ديجا كيكرهو لمسلمين و انت خلقتي بلفطرة مسلمة ... انا مكرهتش كون كانو واليديا مسلمين و تولدت فدولة مسلمة ... مي.... لمهم هو خاصك تفكري مرة اخرى فين غادية بحياتك... يالاه نخليك دابا تعطلت ... نتمنى تفكري فلموضوع شوية ... بسلامة
خرج جايكوب من لباب وخلاني فدوامة فافكاري و كلامو كيتعاود فراسي "ملابسك هدرتك تصرفاتك لا تمت للاسلام بصلة " "هادشي مكيتعلقش بحياتك الشخصية..."
مابقيتش كنستوعب شنو قال و شنو كندير و حياتي فين غادية... هزيت حوايجي و مشيت لدار ... دخلت و جلست ف بيتي و هدرتو باقا كتعود فراسي ... درني راسي و هزيت بي سي باش ننسى كلامو بقيت كندور فلفيسبوك حتى طحت فواحد لفيديو حطاتو واحد لبنت كانت تقرا معايا سميتها مريم مي مكونتش كنحملها حيت افكارنا متباعدين و كنت ديما نقول عليها معقدة... لمهم داك لفيديو كان ديال واحد لبرنامج سميتو "بالقرآن اهتديت" و ديك لحلقة كانت كتهدر على إسلام بنت فرنسية شابةعندها 24 سنة إسمها باربارا ... ملي بدات لحلقة و ديك لبنت كتعاود قصتها و انا كنبكي مقدرتش نحبس دموعي ...

7- 

لهاد الدرجة مقصرة فهاد النعمة لي عطالي ربي و مشحال من واحد باغي يكون بلاصتي... لاول مرة كنحس راسي مسلمة لا كنخجل من راسي حيت كنقول راني مسلمة و انا مكندير تا حاجة كتبين هادشي... خجلت من ملابسي من حالتي لوليت من تصرفاتي مع اهلي سهراتي عدم إكتراثي لديني ... بقيت كنفكر و دموع محبسوش... شنو مصيري انا ؟
واش عايشة حياتي كيما بغيت ؟
واش انا فرحانة ؟ كيفاش هادي نصرانية و حسات بهادشي و انا لا ؟
شنو لفرق بيني و بينها ؟
جايكوب كان عندو صح انا ضايعة و ديعت حتى ديني معايا و كنعطي عليه صورة خايبة .... لا كنكفسها كتر ...
دابا شنو خاصني ندير ؟
نتوب ؟ جاع داكشي ليدرت ربي غايسامحلي ؟ غايقبل توبتي ؟
مي أنا ماعرفة تا حاجة ؟ عمري صليت ! حتى فرمضان كنت كنصوم غيرحيت خاصني ! واش نقدر نلقا ليعاوني ؟
شنو خاصني ندير ؟ تسؤلات كتيرة دوخاتلي راسي وقررت نكمل نتفرج فداك لبرنماج حلقة جوج...معقلتش مشحال مي كل حلقة كدوز كنحس براسي خايبة بزاااااف و خاصني نتعاقب على هاد تصرفات...
ديك ليلة مانعستش ... ليلة كلها كنتفرج ف فيديوهات متعلقة بهاد البرنماج ماحسيت براسي حتال لقيت ساعة كتصوني زعمة نفيق نمشي نخدم طفيت بي سي و انا مصرة نبدل حياتي و لي يساعدني هو جايكوب. ..
مشيت نقلب على مانلبس... و الصدمة كسوتي كلها عراينة تاحاجة ماتفرح... لقيت واحد سروال كحل و قميجة بيضة لبستها و درت مكياج باش نخبي انتفاخ عينيا من كترت ما بكيت ....
وصلت لخدمة كملت نهار غير بزز و عقلي فعالم تاني...
ساليت لخدمة و مشيت نجري عند جايكوب قبل مايخرج...
سارة: سلام جايكوب
جايكوب (باستغراب) : و عليكم السلام
سارة : جايكوب لا يعقوب احسن ... تقدر تعاوني ؟
جايكوب : حتى انا كنفدل هاكاك ... وي تفضلي
سارة : بغيت تعاوني ... بغيت نولي بحالك..

8- 

يعقوب : بحالي !!! كيفاش ؟
سارة : ممكن نمشيو شي بلاصة نجلسو و نهدرو ؟
يعقوب : وي تفضلي
دخلو لواحد لقهوة و جلسو و نضرات الاستغراب على وجه يعقوب ...
اما سارة فكانت فعالم ثاني...
جلسو وبقات ساكته... كسر يعقوب الصمت وقال : هدري ... جينا باش نبقاو ساكتين ؟
سارة : بغيت نتبدل ا يعقوب ... بغيت نولي مسلمة بحالك
يعقوب (كيدحك) : هههه شنو كتقولي انت اصلا مسلمة...
سارة (بدات كتبكي) : لا ا يعقوب. .. انا مسلمة غير بسمية ... عمري عرفت شنو هو الاسلام ...و لا شنو خاصني ندير... بليز عاوني ... ماقدراش نزيد هاكا ! علاش هدرتي معايا لبارح هاكاك .. علاش؟... عرفتي شنو درتي فيا !! زعزتيني ... جبدتي سارة اخرى مكنعرفهاش ... ليلة كامله و انا كنبكي على هاد لحالة لوصلتلها !!! كي ندير نتقابل مع ربي انا ... عمرو مايسمحلي... انا خايبة كفرت (شدات على وجها وكتبكي)
يعقوب (تاثر من حالة سارة و دمعو عينيه وقال) : سمعيني ا سارة و انا هانعونك ... اول حاجة استغفري الله... ربي و ربك كبير عمرك ماتقنطي منو و قال الله عز وجل " ( قل يا عبادى الذين اسرفوا على انفسهم لا تقنطوا من رحمه الله ان الله يغفر الذنوب جميعا ) صدق الله العظيم
و تاني حاجة سيري لدار دابة توداي صلي ركعتين توبة و غدا مورا لخدمة غادي نلاقيك مع واحد لبنت تقد تعاونك كتر مني اوكي و متبكيش ...
سارة (كتمسح دموعها ) : كيفاش منبكيش و انا اخير مرة قريت آية قرآنية كنت فلمدرسة سنين هادي ... كيندير منبكيش و انا عمري صليت ولا عرفت كينديرلها...
يعقوب : حمدي الله يا سارة بيلي فهاد لوقت تا حاجة ما صعيبة ف يوتيوب تكتب كلمة يعطيوك عشرات لمعلومات سيري قلبي و ديري هادشي لي قلت ليك و غدا كلشي غيتبدل كوني على يقين بيلي انتي ف طريق صحيح ...

9-

مشيت لدار بقيت جالسة كنشوف شنو ندير ... كيندير نصلي ... تكيت شوية و داني نعاس مافقت تالغد ليه حيت ليلة د لبارح مانعستش....
فقت لبست بسيف و مشيت لخدمة ... نهار كامل و انا جالسة كنستنى غير إمتا نتلقا يعقوب و ديك لبنت...
سالات الخدمة و ها هو يعقوب و معاه بنت لابسة طويل و محجبة
يعقوب و ديك لبنت : سلام عليكم
سارة : و عليكم السلام
يعقوب : هادي عائشة هي لتقد تعاونك نخليكم بجوج يالاه سلام
عائشة: متشرفين ا سارة فرحت بزاف ملي قالي يعقوب واحد لبنت بغات نعاونها يالاه نمشيو نجلسو لهيه و نتعرفو
سارة : اوكي
عائشة: عارفا راكي تايهة ف افكارك دابا مي انا معاك دابا حسبيني بحال ختك ... غادي نعاودليك قصتي و موراها انت تهدري اوكي ؟
سارة : اوكي
عائشة : انا امريكية الاصل كانت سميتي ساندرا كنت بحالي بحال جاع لبنات ليكتشوفيهوم هنا مي ديما كان كنت حاسة راسي مامرتاحاش كان تيعجبلي نقرا ... قريت بزاف د روايات موراها قررت نقرا لكتب السموية و نبحث اكتر فيها ... قريت على جميع الديانات ليتقدري تفكري فيهوم و كلهم جربتهم اخير حاجة رجعت لاصل ديال واليديا ليهيا لمسيحية... ملي قريت الانجيل كنت كنلقا بزاف د لحوايج ماشي منطيقين ومادخلوليش لراس و بعدت عليها... هادشي كولو و انا عمري قربت الاسلام حيت هنا عندو علاقة بالارهاب... واحد النهار و انا كندور ف يوتيوب و صلت لواحد لفيديو د احمد ديدات و بقيت كنتفرج و عجبولي إجاباتو على الاسئلة لكانو يسولوه كانو منطقيين و قررت نقرا لقران و نفهمو... و هاكدا بدا قلبي يحن لاسلام و امنت بيه و اسلمت الحمد لله. .. و اسمي عائشة سميتو على امنا عائشة حيت تاثرت بقصتها بزااااف ... بصح فلول لقيت عوائق كلشي بدل نضرتو عليا مي انا ديما كنت إلا درت شي حاجة كانكون مقتنعة بيه و حاربت....

10-

 عائشة؛: حاربت باش نولي ما انا عليه ليوم... مورا ما دخلت لديني واليديا ديما كانو ضد مني و مابقاوش بغاو نشوفهم مي انا اصريت باش نقنعهم حتى هوما و الحمد لله ربي عاوني و بابا و ماما اسلمو فنهار واحد يالاه شي 6 اشهر... إوا هادي قصتي هدري انتي
سارة ( عينيها مدمعين) : واااو قصتك مؤثرة بزاف تبورشت انا.... ياريتني بحالك ... هادي هي قصتي... (عاودات لها سارة قصتها من لول حتال نهار ليظهر معاها يعقوب)
عائشة :شتي ربي كيبغيك حيت رجعك لطريقو ... هادي بداية زوينة ليك
سارة : واش كدحكي عليها منين زوينة راهادشي ليدرتو مايديرو حتال كافر ... كيفاش ربي غادي يسامحني كيفاش (شدات على راسها وبدات تبكي )
عائشة : ربي غفور رحيم ... انت خاسكي توبي و صافي
سارة (كتمسح دموعها): نتوب ؟ كيفاش؟!
عائشة (بابتسامة) : مزيان دابا راكي مركزة معايا... شروط التوبة هوما :-يقلع عن المعصية-أن يندم على فعلها-ان يعزم على الا يعود إليها ابدا.
سارة: انا ندمانة بزاااااف و ماعرفت كيدرت تا وصلت لهاد الحالة .... عائشة عاونيني ... عاونيني نتوب
عائشة: عرفتي ملي تكوني مقتنعة ديري شي حاجة غادي ديريها... انا معاك كل نهار من بعد لخدمة نتلاقاو و نبقا نعلمك و كايكون مجمع نهار جمعة كيديرو درس تقدري تستافدي منو بزاف
سارة : شكرااا ليك بزاف ماعرفت كيندير نشكرك
عائشة : الشكر لله وحده... و دابا نوصيك سيري لدار دوشي و توضاي و جددي نيتك بهاد الدوش و لوضوء يمشيو جاع دوك ذنوب ليدرتي... خودي لقران و قراي غير صفحة منو و نعسي و غدا نتلاقاو ... اوكي ؟
سارة (كتشوف فلرض) : ماعنديش لقران
عائشة: ساهل لحال يالاه نمشيو نشريوه
سارة (بابتسامة): اوكي

11-

خرجت انا و عائشة مشينا لواحد محل صغير كيبيع كتب عربية و مترجمة شراتلي عائشة لقران و قالتلي هادا هدية مني ليك باش كلما قريتي حرف منو ناخذ معاك اجر انا طماعة شوية ههه
عجباتني طريقة هدرتها و تصرفاتها معايا فيساع دخلاتلي لخاطري
تفارقنا و مشيت انا لدار كليت و جلست كنفكر واش نود ندير داكشي لي قالتي ؟ زعما نلقا راحتي ؟ كيندير نتبدل ؟
وقفت تفكير ديالي خديت لباس ديالي و مشيت دوشت توديت و خرجت لبست عبايا و حجاب طويل شريناه انا و عائشة قبل مانرجعو لدار .. لبستو و بقيت كنشوف راسي فلمراية ياه ماكيبينيش خايبة بلعكس حاسة براحة
حطيت صلاية حداية و خديت لقران ليعطات لي عائشة كهدية و اول اية حطيت عليها عينيا كانت من بعد ما غمضت عيني و حليتهم فجاة على
قوله تعالى: {قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ وَأَنِيبُوا إِلَى رَبِّكُمْ وَأَسْلِمُوا لَهُ} [الزمر: 53-54].
بقيت كنقرا ونعاود فيها دموع نزلو بدون مانحس
هاد الاية حسيت بها حسات بيا ...حسيت بيلي نزلات ليا انا... حسيت الله عز وجل كيهدر معايا وكيقولي متقنطيش... انا غفرتليك....توبي و صافي انا غفور رحيم و اني اغفر الذنوب جميعا
يااااه ربي غيسمحلي على كلشي ؟ واخا عصيتو بزاف و ما ذكرتوش و باعدت عليه هو غفرلي ؟ ياه حقا الله غفور رحيم