قصة السحر
المدفون في المقبرة :
قصة بالدارجة المغربية المدفون في المقبرة
-الجزء الاول-
أنا العبد
الفقير لله "سمير" من الدار البيضاء..
بغيت نفتح
ليكوم قلبي ونعاود ليكم " قصتي" اللي تتسببات فتغيرات كثيرة فحياتي باقي
كانعيشها الى حدود كتابة هذه السطور.
أنا فعمري 28
سنة أمضيت منها الخمس سنوات الأخيرة بين الذهاب عند الرقاة وبين
اعتاب أبواب
الأطباء النفسيين.
غادي ندخل
مباشرة فالموضوع با ما نطولش عليكوم، " الوالد" ديالي الله يرحمو كان
فقيه كبير ومعروف بين الناس وكان الكثير ديال بنو الإنسان كايقصدوه باش يعالجهوم
من السحر والصرع خصوصا صرع الجن بكافة أنواعه، كان معروف بالكفاءة ديالو فهاد
المجال وما غاديش نذكر الإسم ديالو احتراماً له رحمه الله في هذا اليوم، عموما
الإخوان أنا كنت دايماً كانشوف الأب ديالي وهو كايجيو عندو الناس وكايرقيهوم
و" يعالجهوم" وكان عندي فضول كبير باش نكتاشف اكثر اشنو كايدير، المهم
فاش ولات عندي 15 سنة وليت حتى انا مولوع بداكشي ديال الجن وكان الاب الله يرحمو
كايعاود لينا القصص ديالو مع معشر الجن وباللي شحال من مرة وقع فخطر وكان على سبة
يموت لولا الالطاف الالهية، واحد النهار ترجيتو باش نحضر معاه جلسة من جلسات
الرقية و وافق أخيراً وهادشي وقع غير من خمس سنوات كان فعمري 23 سنة، كانت واحد
السيدة فمتوسط العمر تقريبا 30 سنة، وكانت كاتعاني من مس " هادشي اللي كان
يسحاب لينا" ولكن فالحقيقة كانت كاتعاني من كثر من هادشي، .
-الجزء التانـــــي-
فأول ساعة بدا
الوالد كايقرا عليها ولات كاتوقع أمور غريبة فالبيت لدرجة ان " الاثات"
كايتهز ويتخبط مع السقف ديال البيت ويرجع، ولا كانسمعوا اصوات غليظة وثقيلة كاتهدد
الوالد وكاتهدد البنت، بقا الوالد كايقرا تقريباً أربع ساعات فهاد الفترة قدر يخرج
منها 2 من الجن والبنت كان سااكنها 13 جن وداكشي وقع ليها بسبب السحر الأسود مع
الأسف والصدمة ان اللي داير ليها هاد السحر هو " عمتها" وكان سحر خايب
بزاااف وصعييييب يتبطل حيث مدفون مع ميت " لا حول ولا قوة الا بالله"
المهم الإخوان رقاها الوالد وخرج منها 2 من الجن كيما قلت وفالغد ليه بدينا جلسة
أخرى أنا كنت غير كانراقب من بعيد مكانتتدخل فوالو وفكل مرة كانسمع شي غوات كانحس
بروحي غادي تخرج من بلاصتها، فداك النهار الوالد بقا كايرقي فديك السيدة من الصباح
حتى الليل، حيث حالها كان صعيب واخيراً قدر يخرج منها
Gاع دوك الجن اللي ساكنينها ويبطل السحر أو هكذا "
اعتقدنا" المهم ديك السيدة مسكينة فاقت عادي بحال الى ما كان فيها والو ولكن
ما عاقلة على والو مسكينة وكانت ضعيفة بزاف، داوها الأهل ديالها، ولكن الوالد تبدل
من ديك الليلة، ولا خايف بزاف وما بقاش كيما كان، بعد سيمانة من داكشي عيط ليا
لبيتو وقال ليا ريح بغيت ندوي معاك، كان ممبدل بزاف وباين عليه مقلق من شي حاجة
قال ليا مسكينة بالحرف:...
الجزء
التالـــت-
كان ممبدل بزاف
وباين عليه مقلق من شي حاجة قال ليا مسكينة بالحرف: شوف أولدي سمير، انت الكبير
فولادي، والوصية اللي غانوصيك هي تهلا فخوتك وفالأم ديالك، قلت ليه ياك لاباس
الوالد قال ليا دنيا وزمان هادي أولدي وما عاالم باللي جاي غير الله، المهم ديها
فخوتك وفالأم ديالك وحاول تحصن راسك ، بغيت نهضر معااه صافي سكت قال لي خرج دابا
عندي ما يدار، للاسف كانت هاديك هي أخر مرة نتكلم مع الوالد وأخر مرة نشوفو فيها،
حيث من داك النهار منعنا من دخول البيت ديالو وكانت الوالدة بوحدها اللي كاتدخل
وغير الى بغات تدي ليه الماكلة، كان بحال شي واحد معتاكف، للاسف غادي يتاضح باللي
ديك السيدة اللي رقاها الوالد هي السبب فداكشي اللي وقع حيث من بعد 15 يوم من
جلوسي مع الأب الله يرحمو لقاو ديك السيدة اللي رقاها شانقة راسها وميتة فدار باها
ومخلية ورقة فيها جملة وحدة " لا حياة مع هؤلاء"، هادشي اللي خلات والله
اعلم اشنو قصدات بداكشي اللي كتبات، الوالد ديالي ماللي ساق الخبار زادت حالتو
تأزمات وما بقاش كاينعس، وغير شي أيام قليلة من مور وفاة ديك السيدة، دخلات
الوالدة عند الوالد تعطيه ما ياكل لقاتو ميت والجسد ديالو كوولو " أخضر"
بمعنى الكلمة، جا الطبيب دار الفحص وقال باللي الوفاة كانت بسبب إختناق حاد،
الصراحة الإخوان فداك النهار حسيت بحياتي كلها ضاعت فرمشة عين، وليت أنا هو الأب
والأخ والمعيل للإخوة ديالي ولقيت راسي مجبر انني نهز اسرة وانا باقي ما مستاعد،
وبقا لغز وفاة الأب ديالي وديك السيدة محير وما لقيناش ليه الحل، أما الوالدة
مسكينة فكان فعلها الوحيد هو تريح فبيتها وتبقا تبكي وتقول غصبوك فحياتك ... غصبوك
فحياتك.
-الجزء الرابـــــع-
دازت واحد
المدة على هادشي وتأثرت بزاف فقرايتي وفحياتي ككل بحيث وليت منعازل وخايف من كولشي
حتى من ضلي، فاش دازت 40 يوم على وفاة الوالد عيطات ليا الوالدة وقالت ليا باللي
الوالد الله يرحموا فالايام الأخيرة من عمروا كان كايقول ليها باللي شي جنون
كايجيو عندو باليل وكايهددوه وكايقولو ليه وجد راسك، وهو عارفهوم حيث كانو من ضمن
الجن اللي خرجهوم من ديك السيدة كانو 4 تحديداً وكانو من أخطر أنواع الجن وأشدهم
"بأساً" وقبل ما يموت الوالد الله يرحمو حلمات بواحد المرأة جاتها
فالمنام قالت ليها وجدي الكفن و وجدي باش تشدي حق الله.
ماللي عاودات
ليا الوالدة داكشي زدت تأزمت أخويا وما بقيت عارف ما ندير ما حيلتي لعائلتي اللي
مصدومة وما حيلتي لأمي المسكينة، بقيت كانهدي فيها وكانقول ليها هداك قضاء وقدر و
و و ولكن والو، عموما بعد ايام الحمد لله بدات حالها كاتحسن وكاترجع لطبيعتها،
دازت عامين على وفاة الأب دياليل و فـي 2013 بدات المشاكل بالنسبة ليا، واحد
النهار دخلت للبيت اللي كان الوالد كايرقي فيها المرضى ديالو باش نهز منها شي حاجة
وأنا نلقا واحد السيدة مريحة فالقنط وكاتشوف فيا، أنا شفتها تصدمت حيث اكيد ماشي
شي وحدة من العائلة ديالنا واصلا البيت كان مسدود، بقيت كانقرا بعض الأيات اللي
حافض وهي باقي كاتشوف فيا وكاتبتاسم شوية هي تقول لي ما تخاف من دايا اسي "
سمير" ولكن خاف من بعد خاف من بعد ما جيت فين نهضر ونقول ليها شكون نتي حتى
غبرات من قدامي وما بقيت شفتها، والله اخويا الى تخلعت واحد الخلعة ديك الساعة
لدرجة انني كنت غانديرها فسروالي حاشاك، بقيت كانفكر فداك الكلام اللي قالت ليا ما
لقيت ليه تحليل، بغيت نعاود للوالدة خفت لا تزيد تأزم، المهم دازت شي ايام قليلة
وفواحد الليلة كاتضربني الفيقة وبلا شعور مني كانلقا راسي فنفس البيت، شكون اللي
داني ليها الله أعلم، هاد المرة لقيت ديك السيدة ومعاها 2 رجال والمفاجأة كانت
معاهوم ديك السيدة اللي رقاها الوالد وتوفات من بعد، بلاه بغيت نغوت ما قدرتش
وقاطعاتني ديك المرأة قالت لي بلا ما تخلع هذا غير جن متمثل ليك فالصورة ديالها
وماشي هي،
الجزء الخامــس
ما قبل الأخير -
ويمكن نقولو
باللي سباب فموتها هو الأب ديالك، بقيت كانشوف داك المنظر وما عارف باش تبليت خاصة
أن دوك جوج رجال اللي جالسين معاها كانو فشكل كل مرة وكيفاش كايبانو مرة على هيئة
كلب، مرة هيئة مش مرة حنش كل مرة وكيفاش، قلت ليها وانا كانترعد باللخلعة، شكون
نتي واش كاديري هنا، أنا بالله معاك وبالشرع، قالت ليا أنا ضحية من ضحايا الاب
ديالك، قلت ليها ياك قتلتوه وغصبتوه فحياتو، قالت لي أنا ما قتلت حد باك هو اللي
قتل راسو براسو وبدات تضحك بواحد الصوت غريب بزااف، وبلا ما نشعر كانلقا الحال صبح
وانا ناعس فبيتي، ننضت بالزربة توضيت وصليت ومشيت كانجري عند واحد السيد كان صديق
الوالد الله يرحمو وكان فقيه وراقي كذلك، عاودت ليه داكشي اللي شفت فالليلة اللي
دازت واشنو قالت ليا هاديك وحسيت بيه بحال الى تصدم، قال لي واش انت متأكد من
هادشي اولدي قلت ليه اه الى ما تيقتيني اجي تشوف، صافي قال ليا فالعشية غادي ندوز
عندكوم ان شاء الله ووداكشي اللي وقع دخل للبيت وبدا يقرا ويعزم شي ساعة هو يعيط
ليا قال لي ريح ريحت حداه وبدا يرقيني صافي أنا غيبت ما عقلت على راسي حتى فيقني،
قال لي نوض اولدي راه مكاين والو هنا وحتى نتا ما بيك والو قت ليه وداكشي اللي شفت
فديك الليلة قال لي راني ساعتين وانا هنا وحاولت وما بان ليا والو، صافي مشا
وخلاني حاير ما عرفت اش ندير وبديت نحس باللي يمكن كانحماق، نضت بغيت نخرج من
البيت وهو يتسد بوحدو وفلمح البصر بانت ليا هاديك السيدة عاوتاني وهاد المرة كانو
معاها بزاف ديال الجن لدرجة اني كانحس براسي وسط زحام ما نقدرش نخرج منو،
الجزء السادس و
الاخير -
اخوتي بدات
كاتضحك بصوت عالي وقالت ليا يا ولد" فلان" راك غالط حنا ماشي من داك
النوع اللي يجبدنا الفقيه ببساطة، قلت ليها شكون نتوما جاوباتني: حنا جحيمكم على
الأرض قالتها وكاتضحك وبعدها بدات تقول ليا باللي الوالد ديالي قتل ليها راجلها فاش
كان كايرقي ديك السيدة وقتل واحد أخر كان ساكنها وداكشي علاش ماتت ديك السيدة
وداكشي علاش مات الوالد ديالي، فديك اللحظة حسيت بشوية ديال الشجاعة ممزوجة بالخوف
وقلت ليها ولكن أنتوما كنتو كاتعداو علا ديك السيدة وهي تغوت بالجهد وقالت: ماشي
حنا اللي تعدينا عليها عمتها اللي تعدات عليها وشدات 13 روح وكتفاتها فالجسد
ديالها.
قلت ليها كيفاش
كتفاتها فالت لي بداك السخر اللي دارت ومن الشدة ديالو تسبب الابطال ديالو فقتل
راجلي و واحد السيد اخر وهادشي اللي قتل ديك السيدة وقتل باك حتا هو، قلت ليها
وأنا مالي ياك ما بيني وبينكوم والو، قالت ليا كاين بينا وبينك بزاف باك تسبب
فالإصابة ديال واحد منا وما حدو هاكا غاتبقا تشوفنا وعتابر راسك على "
نقشة" والى ما براش داك السيد غادي تلحق اللي ولدك والعين بالعين فديك اللحظة
غبرات عاوتاني ومن ديك الليلة تقلبات حياتي اخويا وليت كانشوفها فكل مكان فالعمل
فالدراسة فبيتي فكل بلاصة وقتما بغيت ندير شي حاجة كانشوفها بين عينيا، دابا هادي
عامين وانا على هاد الحال ما خليت فقيه ما مشيت عندو حتى من الاطباء النفسيين مشيت
عند 4 وما دارو ليا والو، ولغاية الان كانحاول نخبي هادشي علا الوالدة باش ما
تأترش، دابا هادي 5 ايام ما شفتش ديك المرأة وفاي لحظة يمكن ليا نشوفها واالله
أعلم بالنتيحة، قصتي ما عندها نهاية وما هادشي اللي عاودت ليكوم الا قليل من داكشي
اللي كانعاني منو، وكانتمنى من اللجميع يدعي معايا نتفك من هادشي حيث صعيب بزاف
ويدعي بالرحمة لديك السيدة والوالد الله يرحمهوم.
 |
| قصة بالدارجة المغربية المدفون في المقبرة |
اعتاب أبواب الأطباء النفسيين.
