قصة آلاء ومهدي : حبي الأول والأخير

قصة بالدارجة المغربية :  آلاء ومهدي (حبي الأول والأخير)

 

قصة آلاء ومهدي حبي الأول والأخير

 
(قصه حقيقه مع تغيير الأسماء فقط)

مهدي عندو 26 كيسكن في كازا
وآلاء عندها 18 كتسكن في سطات
تعرفو على بعضهم من خلال الفيس بوك
مهدي صاحب راجل خالة آلاء
وكانت آلاء مسافرة عند خالتها و كتسمع راجل خالتها وخالتها كيهدرو عليه بزاااااف كلشي كيشكرو ولد ظريف ومخلق والله يعمر ليه الداار ... آلاء جاها لفضول تتعرف عليه
مشات دخلات لفيسبوك ديال راجل خالتها وقلبات في الأصدقاء دياله وهي تلقا غير واحد لي سميتو مهدي عندو 
وهي تقول اكيد هو بلاتي ندخل نقلب غي لبروفايل ديالو نشوفو كيدير 
دخلات لقات غير تصويره وحده ديالو 
هي تقول والله حتى نصيفط ليه طلب صداقه نشوفو واش ايقبلني

صيفطتها من بعد يومين قبلها 
ملي شافتو قبلها دخلت لبروفايل ديالو وهما يطلعو ليها تصاور ديالو لوخرين 
عجبها هو طويل ولاطاي ديالو هي هاديك وحروف كحلين وزويين 
وعرفت من لفيسبوك بلي خدام في تأمينات سينيا السعادة 
صافي مهدرتش معاه..ماهدر معاها
صافي داز لوقت ونساتو صافي حيت ماعمرهم هدرو مع بعضهم 
دازت شي شهرين وهو يوصلها ميساج في صباح في الفيس دخلت تشوف لقاتو هو مصيفط ليها صباح النور 
وهي تفرح وتصدمت حيت معمرهم هدرو هادي اول مره 
مهدي:صباح النور 
آلاء:صباح الخير
مهدي:سافا عليك؟؟
آلاء:سافا الحمدلله شكرا وانت؟
مهدي:الحمدلله ..ممكن نعرف شكون معايا؟
آلاء :وي من حقك تعرف..انا آلاء من سطات عندي 18سنة.
مهدي:متشرفين اختي آلاء..أنا مهدي من كازا عندي 26سنة خدام في تأمينات سينيا سعاده .


آلاء:اتشرفت بمعرفتك أخويا مهدي
مهدي:شكرا...إيوا؟
آلاء :من عندك؟!
مهدي:غير لخدمة هاذ الساعة .
آلاء:مزيان .
مهدي: نخليك دابا عندي شي خدمه خصني نكملها..باي باي فرصة سعيده 
آلاء :اه اوك بسلامه...
صافي آلاء جاها داكشي عادي صافي مشات تعاون ماماها في الشقا 
من بعد شي 3ساعات وهو يوصلها ميساج من مهدي 
مهدي:انا رجعت
آلاء:مرحبا بيك 
مهدي: ترحب بيك الجنه ان شاء الله 
آلاء :أميين شكرا.
مهدي :ايوا هدري لي شويه على راسك الا كان ممكن !!
آلاء : وخا ...انا كيفما قلت ليك عندي 18سنه كنقرا في 6éme ..معنديش خوتي كينة غير انا لي عند واليديا 
وصافي هه ايوا وانت؟؟
مهدي: اه مزيان ...ايوا انا الالا ساكن هنا في كازا بوحدي دارنا ساكنين في مدينه ثانيه وانا خدام هنا كيفما قلت ليك وعندي خويا واحد و2 خواتات وصافي ههع 
آلاء :اه مزيان الله يخليهم ليك.
مهدي :امييين ياربي شكرا بزاف .
ايوا صافي بقاو هاكا على هاد لحال شي شهر وهما كل نهار كيهدرو في لفيس شويه ولاو كيهدرو في لواتساب شويه في تليفون وغادين هاكا
مهدي:آلاء بغيت نقولك شي حاجه
آلاء: وي اشنو؟؟
مهدي:بصراحه انتي ظريفه بزاف ومؤدبه وعجبتيني
آلاء:شكرا ربي يخليك حتى انت مؤدب وعمرني شفت منك شي عيب 
مهدي: ايوا الله يجيبنا في الصواب.
آلاء:امييين.

نادية أعز صديقه عند آلاء ..
آلاء:عرفتي اناديه تعرفت على واحد لولد ظريف ومؤدب بزااااف كثر مكتخيلي وهو صاحب راجل خالتي 
عرفتي ياختي ظريف معمرو مخسر معايا لهدرة ولا تجاوز حدوده وعقليته نقيه بزاااف مكيشبهش نيهائيا لولاد هاذ الوقت الي في نفس السن دياله والله 
نادية:الله ياختي سعدااتك قولي لي فين لقيتيه؟ نمشي نقلب تا انا في نفس لبلاصه ههه 
آلاء:اويلي كنهدر بصح وانتي كطنزي عليا سيري فحالك انا الي حمقه جايه نعاود ليك 
نادية :وغير كنضحك معاك اصاحبتي او .هاد المواصفات قليل في تلقايهم ياختي والله سعداتك والله 
شوفي انا مزاوكه فيك والطعام لي مشاركين الا كنت صاحبتك د بصح قسميه معايا راهادي هي الصحبه د بصح اصاحبتي را كاينه أزمه هاد ليامات ههههه 
آلاء:واش محشمتي ماراعيتي هاداك وجهك ولا مسلفاه 
لا اختي منقسموش معاك انا ماصدقت لقيته ههههه 
ناديه:أجي مغتورينيش تصويرتو؟؟
آلاء:سيري أختي بعدي منو انتي غير هدرت ليك عليه وطمعتي فيه علم الله الا شفتيه اش غديري 
نادية: هههههه لا لا متخافيش اوريني ههه 
الاء :اوك تسناي نجبد تصويرتو ....هاهو .
نادية:الله الله الله قلبي في خطار وديتو لسبيطار وطلع ليا مهدي في التحاليل ههههههه 
آلاء:اناري هالي قالت الشوافه هالنهار طلع هههههه 
ناديه: زوين اصاحبتي عجبني هههه الله يسهل عليكم احبيبتي ...وشوفي لي الا كان عندو شي خوه بحالو ههههه..

وهو يصوني عليها مهدي ..
الاء:الو مهدي
مهدي:اهلا الزين ديالي لباس عليك فين غابره من صباح لا ميساج لا والو؟؟
الاء :لا غير كانت عندي صاحبتي ناديه وبقيت كنتحثث انا وياها وصافي ..ودويت ليها عليك 
مهدي:حلفي!!اش قلتي ليها عليا قولي لي كلشي يله يله خلاص 
آلاء:اويلي ابشويه عليك ...والو قلت ليها ظريف ومؤدب وصافي أو 
مهدي:صافي غير هادشي
آلاء:اه صافي 
مهدي:اوك ا لاله ولاهما هاكا ولا والو 
اه راني توحشتك حيت اول مره منهدروش نص نهار كامل.
آلاء(بقات مصدومه حيت اول مره يقول ليها توحشتك) كي كي كيفاش توحشتيني ؟
مهدي؛كيفما سمعتي علاش معنديش لحق نتوحشك؟
الاء :لا غير جاتني في شكل أول مره تقولي توحشتك هادشي 
علاش
مهدي:يله بسلامه انكمل لخدمه ونكملو في لواتساب لهدره 
آلاء:اوك باي.
صافي بقاو كيهدرو ديما ومهدي ولا كيحماق على آلاء وألاء حتى هي كتهبل عليه ..
مهدي:الو حبي كيديره لباس عليك توحشتك
الاء :حتى انا احبيبي توحشتك بزاف والله .
مهدي:ايوا اش كديري دابا؟ 
الاء:والو غير جالسه كنتفرج.
مهدي:ياكما خاصاك شي حاجه ؟؟ 
الاء: لا احبيبي ماخاصني والو الله يخليك ليا.
مهدي:امييين ويخليك ليلي حتى انتي الكبيده ديالي يله نخليك دابا باي عمري غنتوحشك.
الاء :باي حياتي ..متنساش كنموووت فيك .
صافي بقاو غادين هاكا وعلاقتهم دازت من أحسن مايكون وتخطبو حتى لواحد نهار ..
هدى بنت خال آلاء مسمومه ومحساده وكتكره آلاء حيت كتقرا مزيان وكلشي كيحماق عليها وهي لا 
مسكينه آلاء على نيتها كتعود لهدى كلشي..
مشات هدى دخلت لفيس وقلبت على لمهدي وصيفطت ليه طلب صداقه وهدرت معاه واحد لمده عادي 
شويه وهي تصايب فيسبوك جديد وصيفطت لمهدي ميساج قالت لو شفتي آلاء راها مكتبغيكش غير كتكدب عليك وراها ********* ومهدي ماردش على كلامها حيت عارف آلاء اش كتسوا 
ولكن لمشكل انه صيفطات ميساج لأخت مهدي وقالت ليها انا غير فاعلة خير شفتي آلاء لي باغي ياخذ مهدي خوك راها مامزياناش وكتفلا عليه وراها ******
خت مهدي تيقتها ومشات قالت كلشي لماماها 
وهي تقولو ماماه اوليدي ماقادين على مشاكل بناقص من هاذ الزواج وهو مقدرش يخسر لماماه وحتى آلاء قالت لو انا عاذراك دير بكلام ماماك ورضاها هو اللول والي مكتابه راهي لي غتكون 
صافي آلاء ومهدي دوزو شهوور وهما كيبكيو وكيتحسرو علاش لقدر وقف في طريقهم وهما كيحماقو على بعضهم 
صافي دازت عامين على فراقهم ومهدي حبساتو ماماه يتزوج وتزوج بواحد لبنت ماباغيهاش هو مسكين...وديك لبنت كانت ماشي بنت ومع ذالك سترها وماقال هادشي لحتى واحد وحتى هي ماسولها ماقالها شكون لمسك ولا تعدى عليك ولا والوووووو 
حتى من لبنت تصدمت حيث ماكانتش متوقعه هادشي 
صافي داز شهر ولبنت تقلبت وولات قبيحة وتجبد لمشاكل وتعير ماماه صافي وهما يطلقووو.. دازت 3شهر وهو يرجع يتكلم مع آلاء وحكى ليها اشنو طرا ليه في المدة الي تفارقو فيها.... وصافي رجعو كيف كانو من قبل 
وجا خطبها وتزوجوو وولدو بنوته وولد آميره وزياد 
وعاشو في سعادة . 


النهايه (قصه حقيقيه)