قصة مابغتش نتزوج من العروبية
 |
| قصة مابغتش نتزوج من العروبية |
الجزء 1
وهانتي شوفي بنتك 11 ليل وباقا مادخلتش ،ايلا محدرتش دابا والله لاباقا حطات رجلها لانتي لا هيا فهاد الدار،ولا عرفتي شغايجيك مليح غنبيع هاد الدار وطوموبيل والاملاك كاملة ونخليكم كادورو باش تعرفو كلمتي اش كتسوا
لالة فوزية عيات ماتصبر وترغب فسي سعيد وهيا فخاطرها تلعن،وتحلّف على بنتها “حتى تجيني ،انا لي غنعرف الشغل معاها”
مع 11:30 حليت لباب بشوييية لقيت ماما وبابا واقفين ليا بحال بسم الله الرحمان الرحيم،بابا كيخنزر فيا وماما كتعاير ،شداتني لخلعة ولكن قصحت وجهي لي ديما مصندل وخرجت عينيا شوية :امالكوم دايرين هاد الحالة راه غير دار صاحبتي شدوني نتعشا
بابا بقا كيغوت،وآنا طلعت لبيتي،ديما كيبقى يهددني بلي غيبيع الممتلكات وغيخلينا نطلبو انا وماما قدام الجامع ..ولكن غير كيهدر مايقدرش
ماما جات عندي كتسولني :افين كنتي،ليوم باباك كان غيقتلك!
انا مْبَرْدَا السوق:اماما ياك قلت ليك كنت فعيد ميلاد اناس للي كيقرا معايا،وبقينا حتى تعشينا انا وصحابي وجيت
ماما دارت فيا شوفات خايبين:اويلي ويسمعك باباك،ياك قاليك قطعي عليا ديك الصحبة،لا قراية طفرتيها لا مجي بكري،
بدات كتندب :اويلي ،آويلي لآ لا تاليتي معاك موحال واش غتخرج على خير،واش باغا تمرمدي لي وجهي انا وباك فالتراب ،امالك ابنتي خارجة ليا من الجنب،شوفي بنات خالاتك كيف عاملات،وشوفي بنت عمتك غيثة هاديك هيا لالاك بنت سيدك بنت دارهم،وانا عندي خراجة ..
بقات ماما كنتهدر وانا عينيا كنحس بيهم تقال بدموع،دموع غينزلو من عيني بسباب واليديا لي ماكيقبلونيش كيما انا،باغييني نكون نسخة طبق الاصل لبن فلانة
كنهدر بحال فلانة،ندير بحال فلانة بنت فلانة،ومهما حاولت نقلدهم ونكون حسن منهم،ديما غتبقى هاديك فلانة حسن مني ،،لالة بنت سيدي
كا كلامهم كيجرحني،كنت كنتعطل ضد فيهم،كنعمل لي ماكيبغيوش،واخة كان الثمن انني نسمع هدرة كتقتل كنت كنعاقبهم بطريقتي ..رضاتهم صعيبة
الناس ماكانوش كيحسو بيا،كنبان ليهم شعر مصاوب،واللبس اسحابليهم عايشة فالجنة ولكن قلبي ماكيعلم بيه الا الله
بابا مابقاش كيهدر معايا،فالفطور كيفطر قبل مانفيق،وفلغدا كينخلني وفلعشا كيقول لماما جيبي لي عشاتي لبيتي
هاكدا كيتعامل فاش كيتقلق مني كنت كنطلب من الداخل ديالي انه يضربني يخاصم عليا يدير لّي يدير الّا ينخلني ويعاملني كأني ماكيناش..
كنت كنقول نمشي عندو ونتصالح ونطلب السماحة وشوية كنقول لا بلاش ،المهم درت حتى عييت اومشيت
دقيت فالباب ماجوبنيش،دخلت لبيتو ،لقيتو كيف العادة جورنال ديالو وكاس القهوة حداه ونظاظرو فعينيه شاف فيا تحت منهم قالي منعستيش !
مشيت ريحت حداه بابا راه بغيتك تسمح ليا راه داك نهار والله ما..
قاطعني قالي:لا ابنتي ديك الليلة ومعا 11:30 ديال ليل كملني
بقيت كنشوف وحدرت راسي:قلت ليه راه غير كنت معروضة لعشا وشدوني واليدين صاحبتي
خنزر فيا :ماخليت لمن عيطت ديك الليلة ڭاع صحاباتك وشوهتيني مع واليديهم،وماماكشوية غاتحماق،ونتي الالة خدامة كتبوردي عليا هنا وكتكدبي عليا،ياكمة عند بالك ماجايب خبار،ايوا مزيان بنتي انا سهرانة ليا معا دراري ايوا هادي زيديها على الزبايل ليدوزت ليك انا وماماك،ولكن هاد المرة ماغنبقاش كنتفرج فيك سيري تنعسي
ماعوتش معاه الهدرة ،حسيت بشي حاجة واحلة ليا عينيا نزلو منهم الدموع حسيت براسي مخنوقة و غادا نتفرڭع
مشيت عند ماما لصالون لقيتها متكية,,
الجزء2
تكّيت حداها وبدات كدوز ليا ايديها على شعري،فاش كتعملي هاكداك كنترخى وكنرتاح وتقريبا نقدر نقول كنسى الهم وللي فقلبي
لغد ليه قالينا بابا غادي معروض لبلاد لعرس لولد عمتو تزوج
فاش كنسمع عرس فالعروبية كنتخيل العريس لا علاقة شي عروبي كان كيتسارا عريان فاش كان صغير وڭاع الدوَاوَر شايفينو،و واليديه فرحانين بيه وفخيرين بولدهم
ولعروسة شي وحدة كانت مشعكة وعامرة خنونة فاش كانت صغيرة وكاضارب معا كلشي وحتى هيا غادة تكون شايفة لعريس فاش صغير وكان عريان،كنبقا نضحاك
كنت كنضحك عليهم،ولكن هما لي ضحكو عليا من بعد!
مشينا،وصلنا ماكاين غير الصهودات بابا واحد لوقيتة بان ليا معصّب بقا كيقول لماما شوفي هاد الناس خداو لي حقي فالارض وزارعينو كيستغلوه بلا خباري
انا لو كنت فبلاصتو كنت غادا نعطيليهم الارض هما مافحالهمش ولكن ماكنتش فاهمة شنو الارض كتعني ليهم
وهادوك كيقوليك خود واحد من ولادي ومانعطيكش طرف من ارضي،من سمعت هاد المقولة تصدمت ولكن هادي هيا الحقيقة الفلاح المغربي يضحي بكلشي ماعاد راسو هوا من اجل الارض ولكن هادوك الاراضي كيستحقو النضال
المهم دخلنا لدار العرس،بان ليكلشي كيشوف فيا،وبزاف ديال البشر ماكنعرفمهش مشيت لواحد لبليصة حدا ماما وجلست
قالت ليا ماما ونوضي سَلْمي هادي راه فلانة وهاديك راهة بنت فلانة وهاديك بنت فلانة
نضت على وعدي وسعدي كنسلم وحدة بوحدة وهوما سلامهم فشكل،كيعصروك وليت كنهز الهم لكل واحدة غنسلم عليها،فبحال هاد المواقف كنقول سعدات الدراري سلامهم زين،العيالات هنا كيشمو فيك ريحتهم ومن قلبهم كيعنقوك وكيبوسوك حسيت براسي عزيزة عند ناس عمرني عرفتهم وقلبهم طيب
وصلت لفئة الشابات كيديرو فيا شوفات فشكل كيسلمو بشوية وبحالا ماحاملينيش المهم سلمت على العروسة وباركت ليها :وداعات معايا هاديك الدعوة لي تحققات ولي بدلات حياتي
امّا فئة البراهش كانت كبيرة لدرجة انني قررت نتجاهلها ونمشي بحالي
داز العرس زوين اجواء فشكل،كولشي ناشط حسيت براسي مامحتاجاش نتصنع كان اول عرس باكنستعملش فيه البروتوكول والتكتيكات باش نبان كلاص كثر اول مرة كاناكل بايديا وكنشطح واخا ماشي بحال ناس ديال داك الدوار لمهم كنت على طبيعتي
سالا الفرح ودازت 5 ايام وحنا فالطبيعة والراحة النفسية
حتى داك الصباح لي جات فيه الواليدة فرحانة :ايوا هانتي ابنتي غادا تدي سيد الرجال
"
الجزء 3:
حتى داك الصباح لي جات فيه الواليدة فرحانة :ايوا هانتي ابنتي غادا تدي سيد الرجال
انا بديت كنضحك قلت ليها وشكون هادا
قالت لي واحد من هنا
امكن ديك اللحظة نسيت انها ماما تجننت وبديت كنغوت اويلي غنتزوج عروبي؟مالي شايطة اماما ،كضحكي ياك لي عقلت انني درت حالة والحيحة
سمعني بابا:جا كيجري ياك لاباس؟
لقاني مطلعة ڭروني لسما وشاعلة
خنزر فيا:اش نخليك كدوري حتى تجيبي ليا شي موصيبة ولا ديري ليا شي فضيحة !
فاش قالي هاكداك:جاني انهيار عصبي ماقدرتش نستحمل باقي،بابا كيقولي هاد الهدرة تصدمت
مشيت كنبكي عند ماما:قالت لي ابنتي البنت مصيرها الزواج ليوم ولا بعدو غادا تزوجي،وحنا هاد الراجل لي جاك مزيان،راه هادا عام باش هدر باه مع باباك وباقي صغير وهي كتهدر مابقيتش كنسمع ليها وليت ذابلة فبلاصتي بحال شي جثة بلا روح تمنيت الموت ،لاني ديما كنت كنتخيل غادا نتزوج بشيواحد كنبغيه وكنعرفو ومن مستوى ديالي وقاري،ماشي عروبي
بابا كيموت على البلاد وكيموت على عائيلتو لي فالبلاد ديما كيمشي عندهوم فاش كنت صغيرة،وفاش كبرت كندوز الصيف عند خالتي ف كازا وهو وماما كيدوزوه فالبلاد
حاولت نهدر معا بابا باش يتراجع فقرارو باش غير يفهمني لاش لاحني لواحد فهاد القرينة الكحلة
قالي:هادشي لي كيصلاح ليك
قلتلو والقراية ؟
قالي:آشمن قراية لافاك سكنتي فيها 6سنين كاتقراي الطب!
قلتلو بغيتي تزوجني واخة نتزوج ولكن ماشي واحد من هنا من المدينة وآنا قابلة بيه،وايلا مابغيتيش غادا نتاحر،ولا عرفتي آشنو غادا نتزوج بيه وماباڨيش تهدر معايا
معرفت واحد التصرفيقة منين نزلات عليا ديال الواليدة ،حتى معجباتهاش هدرتي هاداك النهار امكن قللت ادبي على الواليد
قالت ليا:باك ابنتي لي وقفتي قدامو وخرجتي فيه عينيك وقلتي هاد الهدرة لي ماشي من ترابينا دار عليك لي مايدار وفاش شافك غادة تزلقي وضيعي من ايديه بغا يسترك،ماتلينا قدرنا عليك،كبرتي وعليتي علينا
حسيت بكلشي دار فيا وكلشي فديك الدار لي جالسين فيها جاي كيتصنت ماحملتش
بقيت كنبكي،ماعندي حتا حد ليل كامل وعقلي خدام آش ندير واش نهرب ولا نتاحر ولكن هادشي حرام ،استسلمت للقدر واعترفت انني كنت طايشة وداكشي لي كنت كندير ولقيت راسي بلا واليديا ورضاتهم مكنسوا والو…
الجزء 4:
رجعنا لدارنا ف الرباط ،دازت شهرين و9 ايام وجاو عائلة بابا ،واليدين لعريس يديرو الخطبة هاداك النهار ماكن حاملة نهدر مع حد بزز باش قاديت شوية حالتي ومافياش لي يشوف شي حد وخاخة كان عندي فضول نشوف هادا لي غنتزوج بيه نزلت لقيت كلشي كيضحك،وناري كيهدرو بجّهد،ماقديتش نبقى مريحة معاهم،ماحسّاك نعيش معاهم،جايبين معاهم عجل،كون عطاوه ليا غير فلوس كون صرفتهم كاملين فالحوايج بديت كنحنزز فكل واحد من هادوك الرجال اينا واحد فيهم واشناهيا سميتو ،تاواحد مافيه الضو،ناري هادي هيا النهاية التعيسة ،كلشي صحاباتي ايلا عرفوني مزوجة بواحد من هادو غادي يضحكو عليا،هادشي لي كان معمر لي راسي بداو كيزغرتو والدار كتهز وكتحط كندير ضحكة ديال بزز وماحاملاش وماباغياش .. جا وقت الخواتم،الصراحةفاش شفت الخاتم لي جاب لي سي العريس تصدمت زوين كيحمق كنت كنتخايل خيجيب لي شي حاجة معربية ولكن فرحت على الاقل عندو الدوق ،وقفت عليا مامات لعريس،قالت لي ايوا ابنتي خصكي تصبري راجلك ماصابش كيف يدير حتى يجي اويلي وعلاش ماجاش طلع ليا الدم،قلت ليها فخاطري لهلا يجيبو اراي ليا الخاتم لهنا بقاو كيضحكو هيا وماما لعيالات:كيقولو دابا يطلع ليك فراسك ودايرين فيها زعما راه فاهمين وعايقين المهم لبست الخاتم الي معا ايديا وعجبني وداز كلشي مزيان الحمد لله واخة كنت كاعية وساخطة على الوضعية بقاو عندنا شي يامات،اصراحة هما ناس ولافين وولفت ريحة المسمن والبطبوط كل صباح ولبن والزبدة وكلشي لي كيصاوبوه هادوك الناس كنشوف بابا كيف فرحان وماما فرحانة حتى هيا وانا ديما كنفكر آشنو غندير وكيف دير هاد راجل لي غنتزوج بيه لمهيم جا النهار لي غانتلاقى انا و الزوج المستقبلي،كانو كيعاودو ليا عليه بزاف اهلو وديما جابدينو فالهدرة وداكشي لحد لي سمعت عليه هو مزيان،كيتبورد الخيل،وعندو اراضي شي اراضي ديالو شاريهم بفلوسو وشاري طوموبيل كيسافر بيها وقاري حتى الباك وسميتو “عبد الرحمان”،و حشومي وولد الناس ومهما قالو ليا عليه غادي ديما يبقى عروبي جا ودخل لدّار، قلبي بدا كيضرب بطريقة جديدة وحسيت باحساس جديد عمرني حسيتو من قبل ترجمتو فداخل ديالي انني غير باغا نشوفو فوجهو ونشوف ديك الهدرة لي قالو ليا عليه واش بصح ولا لا بقيت كنتسنى فالبيت حتى جات عندي ماما باش نزل نسلم عليه،،طلقت شعري على كتافي ووقفت مقادة ،نازلة من الدروج وانا كندعي فالداخل ديالي باش يكون حسن ما تخيلتو بش يكون هاداكشي لي عاودوه بصح،باش يكون كيفما رسمتوفاحلامي يتبع
الجزء 5:
بقيت كنتسنى فالبيت حتى جات عندي ماما باش نزل نسلم عليه،،طلقت شعري على كتافي ووقفت مقادة ،نازلة من الدروج وانا كندعي فالداخل ديالي باش يكون حسن ما تخيلتو بش يكون هاداكشي لي عاودوه بصح،باش يكون كيفما رسمتوفاحلامي
واقف فالصالون مع بابا وحداه بّاه طويل وعاطي لعين،كيبان راجل لابس جلابة بيضة وسمر شوية طويل وعامر بقا كيشوف فيا جا سلم عليا قالي ناديا لاباس ؟شكلو زويوَنْ عروبي زوين هه جاوبتو الحمد لله
جلست حداه والعيالات كيزغرتو وكلشي ناشط وانا مازال شي حاجة فيا مامخليانيش نكون مقتانعة بعبد الرحمان
انا حسيت انني عجبتو لانه لو ماعجبتوش غادي يهدر ويقولها
نبغي نهدر معاه باش نعرف عليه شي حاجة ولكن كلشي حاضيني وهو لي راجل ماهدرنيش ن غير شي كليمات قلال
مابغاش يبات بقا بابا كيهدر معاه وهو داير فيها مرجل ومعقول لا منباتش اسي الحاج خاصني نمشي حتى ندير ونرجع
جا سلم عليا وقالي في امان الله ،فاش مَدْ ليا ايديه باش نسلم،ماعرفتش لاش حشمت منو وهوا ماكيعني ليا والو،ارتبكت وبديت نترعّد،بقآ كيشوف فيا وبغا ينزل ايديه،زعمت وشديتلو ف ايديه
كانو ايديه دافيين خلاوني نحس بالصهد والتبوريشة ،تحدر عندي حتى قرّب لوجهي ايصحابلي غادي يدير شي موصيبة رجعت باللور قرب لودني همس ليا:رخي ايديك كلشي حاضينا،وحنا ماشي بحالكم هنا ،،تصبحي على خير!
بديت كنتفتف محملتش،حرقني وخلاني بْلاكة ،حدرت راسي وبقيت كنشوف فالارض سمعت بسلامة بسلامة،وطلعت لبيتي وسديت عليا،مقدرتش نجلس فبلاصتي شعلات فيا لعافية على داك الموقف وديك الهدرة،ماعجبنيشالحال فاش قال حنا ماشي بحالكم،وانتا آش تكون عروبي آش كتفهم نتا بقيت ديك الليلة كنْسَب ونخاصم
جات ماما كتشاور زعما ايلا قلت لّا غادي يدوها فيا،ماجوبتهاش بقات كتهدر وانا عقلي يخمم وكيفكر ف للي جاي
بقيت فالدار مع ماما وبابا ودعت صحابي،ودعت حياتي حياة الشباب وندير لي قال ليا عليه راسي،كنت ماكنتسوقش،كنديرلي عجبني وبلا فْرانات ! وهدشي لي خلا واليديا يسخطو عليا وزوجوني لهاد كحل الراس لي حاس براسو على والو
كل نهار كنفيق كنقول يا ربي نكون غير كنحلم مايمكنش نسكن انا فالعروبية خاصني شي حل وليت كندعي ديما بالفكاك ولكن هادي هيا لخْرة ليا
اهل عبد الرحمان قالو لبابا نديرو لعرس فالبلاد لحقاش صعيب على ڭاع الناس يحضروا والناس ماكينش فين يباتو لحقاش هوما كتار تباركالله الدوار كامل باغي يحضر
شاف بابا هو وماما حتى عياو وقالو نيت حسن
مشينا كلشي واجد وداز العرس بالتقاليد وبشي عادات عمرني عرفتهم كاينين!
جا عبد الرحان بالخيل ديالو باش يديني ف آخر الليل لدارو والدار لي غنباتو فيها ،انت فيا لموت ديال لخلعة حنا غاديين والناس تابعينا بالتطبيل والغنا لي مافهمت فيه حتا حاجة واخة كان فشكل كان زوين
يتبع
الجزء 6:
دخلنا لدار ودخلو معانا،انا كنت كنقول غادة ندخل وناخد لبيت ليا بوحدي نبات فيه وهو يشوف فين يبات داكشي ديال نبات انا وياه تحت سقف واحد والله لاكانت ليه،وفاش بانو ليا ناس جلسو قلت نيت نجلسوا كاملين
حتى يصبح الحال،ولكن ماعرفت شي عيالات منين تسلطو عليا جروني لواحد البيت دخلت لقيت عبد الرحمان فيه
بداو رجليا كيقفقفوا اناري اش هادشي،،بداو كيطيحو ليا مشاهد ديال الافلام المصرية على ليلة الدخلة بديت كنخنزر فيه ،وانا نقوليه :شوف الناموسية ديالي،وانتا شوف فين تنعس،وراني مخيفاش منك
بدا كيضحك وتم جاي لجيهتي :قالي بصح ماخيفاش؟ انا خلعتيني بعد بشوفاتك وجلس كيضحآك عليا
فش قرب ليا:قلت ليه ايلا قربتي ليا والله حتى نقتلك
زاد كيضحك ثاني:قالي يالاه عطيني سروالك وماغنقربش ليك،وايلا مابغيتيش غادي ناخدو صحة ،،ختاري
خرجت عينيا فيه :نتوما العروبيةا ماكتحشموش آش هاد الهدرة لي كتقوليا نتا ماشي بنادم،راه قلت ليك ماتقربش ليا يعني ماباغياكش وسير بعد مني ولا سير شوف آش دير
تخلعت ملي شفتو جمع الضحكة هدرتي والتفرعين ديالي موحال واشي يخرجوني سالمة هاد الليلة وملي شفت القضية حماضت بديت كنبكي ليه
مشى تكّى فبلاصتو وعطاني بضهرو،قالي :ديري لي عجبك،انا ماكنتش باغي نحط عليك ايديا ولا نقرب ليك،غير الناس لي على برا راه ماغادينش حتى نعطيوهم السروال
جيت جلست حداه ودموع خربقو ليا المكياج و ولا وجهي كيخلع
دار عندي وبقا مصدوم وبدا كيضحك تاني:واش بصح اقالو ليك والو ولا كضحكي عليا
بقيت كنحلفليه بالله حتى ماجايبة لدنيا خبار
،ناض وقاليا:هانتي دابا … ومايمنش زعما نتي ماعارفاش؟
عاودت ثاني كنحلف ليه ،وكنشوف فيه وكنتسناه يهدر،وجهو ولا كيف الماطيشة وبدا كيتمتم فالهدرة وانا نهض فيه ؛وافي هدر ولله ماعارفة
شاف فيا شوفة ديال شي وحدة ميؤوس منها ولا علاقة :قالي هنتي غاناخدك على قد عقلك المبرهش
دابا المراة والراجل فاش كيتزوجو فليلة العرس اووؤف ناري واش بصح ماعرفاش ؟
قتلو نعيط على ماما؟ ونعاود ليها
جرني من ايديا قالي:واش حماقيتي الناس غيهمونا غلط ،قالي شوفي اراي ليا سروالك ونفكو هاد الليلة ولغد ليه هدري ع اك ومع جاداتك ،المهم هاد الليلة خاصنا نعطيوهم سروالك
فاش سمعت هاد الهدرة تماك فاش ركبني العناد وقلت ليه من هنا حتا تقول ليا آش كاين
بقى مصدوم فيا مسكين وغير كيشوف
شرح ليا بزز الموقف ،الناس لي هنا من العادات فليلة العرس ،اهل لعريس كيتباهاو بلعروسة انها بنت وبسروالها لي كيكون فيه الدم ،انا تصدمت لاحقاش هادشي ماكنديروهش حنا وماما ماقالتليش عليه ،،
عطيت ليه السروال،جبد زيزوار قلت ليه ناري آش غادي دير؟
قالي:والو ،جرح صبعو ودار شوية الدم السروال ورماه ليهم من الباب وسد الباب،وقال ليا سيري تنعسي
بقيت مصدومة من هاد المشهد ،كنسمع الناس من ورا الباب كيطبلو وكيغنيو على سروال وليني التخلف هادا،يالاه بديت بغيت نڭر قاليا :عافاك عيان وفيا النعاس تال غدا وهدري وخلا ليا ناموسية وهو نعس فالارض
حسيت بحالا بقا فيا،وبلي انا كنتسرع بزاف وبنت تافهة قدامو،هو على الاقل جرح راسو على قبلي وانا كلمة مقادة مقدرت نقولها مشيت نعست وقلت غدا نتسامح معاه على لهدرة لي قلت ليه قبل
لغد ليه فقت مشعكة،شفت راسي فالمراية تخلعت،نضت نقلب عليه مالقيتوش فالبيت،هاديك فرصة نخبي شوهتي
مشطت شعري ومسحت بقايا المكياج لمرَوّنْ
………
الجزء 7
هاداك كان صباح جديد ،ماشي بحال الصباح لي تخيلتو ،،صباح فقت لقيت راسي مشعكة وماباغاش عبد الرحمان يشوفني معرفتش علاش ولكن مبغيتش
مشيت جمعت الحالة وجاو تاني الضياف هادوك الضياف خاصهم يجيو يسكنو معايا حسن ليهم غادين جايين ،هه المهم كنقلب فالدار مابانش ليا،فين زاد هذا عاود تاني
فاش بغيت نتوادع مع الضياف لقيتو واقف مع الرجال وشي صحابو ومقارنة مع هادوك لي واقف معاهم هو الزوين فيهم ،هاديك اول مرة حسيت بشي حاجة فشكل شي حاجة مافهمتهاش
دزت السيمانة الاولى ،كل واحد شاد فينا بيت،،انا طبعا خديت البيت ديال النعاس كنتجبد فيه وكندير فيه اللي بغيت،كنتكونيكطاواخا الريزو مرة شاد مرة لا،وحتى ڭاع ضْسرت ووليت ناكل فيه
ماما كان خصها تمشي وتخليني الرابع من بعد العرس بوحدي يعني وليت خاصني نطيب ونجمع الدار بوحدي،يالاه كنعرف ندير شي حويجات،،ولكن ماشي داكشي ديال البلدي ..
السيمانة الثانية وليت كنحس بالملل،او ماكاين معامن نهدر وعبد الرحمان ماكيديهاش فيا،كيعاملني بحال البرد فالاول كان عاجبني لحال،ولكن دابا لا،على الاقل ناكلو بجوج ولا نجمعو،،هاد الدار لي ساكنة انا فيها دايرة بحال شي حبس مابقاش عاجبني الحال،هادي ماشي الطريقة لي تعودت عليها،كنت كل نهار عندي بلان،،،وصحابي كانو معمرين وقتي،،،وهاد العروبية مافيها مايدار القحط والجفاف
كنت حاولت نتعرف على البنات لي قدي ،،مكنقدرش كنحس بيهم دايريني ضحكة بيناتهم ،،
صافي غنهدر انا معاه مابغاش يهدر نْهدرو
مشيت عندو دقيت فالباب سمعت خطواتو فجيهة الباب بديت كنقول نهرب نرجع فحالي يالاه لقاني باغا نسْلَتْ وهو يحل الباب فوجهي على غفلة )على غفلة وماقريت حسابو وانا كنكتب طاحت لي فبالي تحية لنعيمة سميح (
آش خاصك؟
الجزء 8
حل الباب فوجهي: آش خاصك!
ملقيت مانقول،بديت كنتفتف وكنخلط فالهدرة هاديك الكلمة مابغتش تخرج..
هو بقا كيشوف وكيتسنا،، شداتو الضحكة،،قال ليا صافي آجي دخلي
أنا قلت ليه:لا لا..كيفاش ندخل ماجاياش عندك
هز حاجب وطلع حاجب : بصح؟بلاتي راه واحد باسم الله الرحمان الرحيم كان مريح معايا واقيلا جيتي عندو ولكن خصارة يالاه لقيتيه مشا،،،وبدا كيضحك،،
شداتني البكية حدرت راسي وقلت ليه سمح ليا،ومشيت،،
جرني من ايدي بالجهد قالي :آجي شفتك ماشي على راحتك ڭلت نبسط معاك …ياكما تقلقتي
بقيت حادرة راسي ومكنجاوبش
بقى ساكت شحال :قالي وعلى الاقل نڭلسو وديك الساعة ڭولي آش خاصك ياكمة حشمانة؟
وانا ديما ساكتة وحادرة راسي،ماعجبنيش كيفاش هدر وداك الضحك ماحملتوش بحالا كيضحك عليا ماشي كيضحك معايا،ولكن آنا لي درتها لراسي آش داني عندو وانا مالي تعڭد ليا اللسان
دار ايديه على حنكو: هانتي ا لالة هاحنا كنتشمشو حداك حتى تهدري على خاطرك ومتبقايش فڭعانة
جا حدايا قرب لوجهي: اويلي آش كدير
رجع لبلاصتو وتكى : نتي عقلك باش عامر معمراه بالعجينة واقيلا ،،بغيت واش نعستي هه
ناري هاد الباسل شحال باسل
قلت ليه:وا نتا ضحكك ماكنحملوش
قلب وجهو:واش مالقيتي معامن جيتي كتجبديني،لكن انا مغنديهاش فيك
فالصراحة جابها انا مالقيت معامن سمح ليا جات فيك الدقة ،صافي جمعت راسي وقلت نهدر معاه ونسولو آه غنسولو علاش كيعاملني بحالا ماكيناش وعلاش مكيديها فيا،علاش ديما منخلني
سولتو:قال ليا نسيتي آش قلتي ليلة العرس
هاد الهدرة كاينة والحل الوحيد هو انني نكر
درت راسي مسكينة : ناري ،انا قلت هاد الهدرة؟هادشي ماكينش راه ماشي هاكداك
دار عندي وشاف فيا،يعني الموضوع غيكبر،،،ولكن انا ديما غنبقا فنفس الموقف نْكُرْ كلشي
قاليا:،وديك الهدرة لي كنتي كتقولي لماماك،ديال “غيديرني خدامة،هو عروبي شوفي حالتو وڭلسة كتبكي مالكي مزوجة بزحافف؟
وجهو حمار وعلامات الغضب بانو ن اماحسن نوض بحالي،انا كنت باغا نجمع ونهدر شوية آش داني لهاد الصداع وانا مقفراها ولكن آجي..
اجي نتا كتسنط عليا ؟
بقا كيشوف فيا زعما باش نحشم ولكن بقيت كنحنزز
قالي:والله ماكتحشمي هاداك النهار كنتي كتغوتي وكتهدري بالجهد،،وفضحتيني كوراه ڭع الناس عرفو شوهتي معاك!
لا لا انا صدمني كيفاش شوهتك،انا مشوهاك ولا شنو ،،
الجزء 9
شوهتو اه شوهتو هو مع الناس ديال هنا،وشوهت بابا مع صحابو ومشوهة ماما مع العائلة أنا مجرد عبئ تقيل على ڭاع الناس لي بجنبي،أنا كنجيب غير الشوهة أنا مكنصلاح لوالو يعني ضروري هاد الهدرة نسمعها منو حتى هو
وقفت بزربة وخديت النفس وخرجت تنهيدة تمنيت يخرج معاها همي عطيت بوجهي لهيه:”سمح ليا بزاف ايلا شوهتك نيت انا غير شوهة،انا حد ماكيبغيني ونيت بقى كيفما نتا دابا مكتعبرنيش داكشي لي كنستاهل عاملني بحال ايلا ماكيناش عاملني بحال والو، ايلا واليديا لاحوني هاد اللوحة شنو زعما غادي تجي نتا وتخرجني منها؟! ديرلي كيفما دارو ليا
خطويت خطوة قالي :ڭلسي،قالها بشفقة امكن بقيت فيه أنا بقا فيا راسي على المواقف والزهر للي معنديش
الطريقة لي قالها خلاتني بلاما نفكر نمشي نرجع لبلاصتي،كنت محتاجة نسمع هدرة تقويني،كنت نترجّى وهو ساكت مايجرحنيش كثر ميقوليش هدرة تزيد على مابيا،بغيت نشد فآخر خيط من الامل بيني وبينو واخا تقطعو ليا كل الخيوط …
بكثرة الحرق لي فداخل ديالي كان هو هادئ ،كيهدر بشوية طريقتو خلاتني نسمع آش كيقول
شاف فعيني ديريكت قالي :انا بغيت نقوليك نتي عندك الصح ولكن غالطة،بغيتك تعرفي ان هدرتك جرحاتني وكيفما قهراتك هدرة واليديك حتى انا قهرتيني واخا جات منك معجبنيش الحال ،كل نهار كندوز من حداك كنقول غادي تجي وتعتاذري… تسنيتك كل نهار تجي عندي.. واخا غير السلام؛ كنت غنسمح ليك،قستي الرجلة ديال راجل عروبي!
واليديك قبلو باش يتناسبو معايا،وانا والله ماكان فخباري نهار للي هدر الواليد ديالي مع باك ماقاليه والو قبل وقال مانلقاوش حسن منك،كنت كنتوقع انك قابلة بيا وهادشي علاش ماتقبلتش ,حتى كلمة من للي سمعت،آه هاداك النهار سمعت كلشي لي قلتي نتي والواليدة ديالك ماكنتش ناوي نتصنت ولكن بصاح راه كنتي كتغوتي ههه
وهانتي كيفما شفتيني عمرني غوت عليك ولا قلت ليك ديري هادي ولاديك وحتى من البيت راه عاطيه ليك خوديه رتاحي فيه .كوني متأكدة ان حتى حاجة ماتخصك،وأنا معمرني نآديك ولا ندير ليك شي حاجة لي ضرك،أنا باغي ليك غير الخير وراه كتجيني حشمانة مني
أنا عرفتو هاديك حشمانة قالها بلعاني كان خاصو يقول منفخة لاني كنت كنعاملو بدون المستوى وهو عامل ليا مستوى
بقينا كنهدرو وكنتناقشو،لقيتوكتاب مفتوح لقيتو انسان متفهم ،بالنسبة ليا العروبية ماكيفهموش المشاعر الانسانية كلشي عندهم حشومة ولكن لقيت انسان كبر مني فلعقل وكياخد لي بالخاطر
نسينا اننا كنا مخاصمين،انني جابدة هاد الصداع وحشمت على الهدرة لي قلت عليه وكون صبت الارض تشق وانا نتخشى فيها،عتذرت وهو بقلب كبير تسامح معايا وحتا هو تسامح معايا
دازو ايام والزمان كيدوز معاها كل نهار بحال لاخر عندنا عادي بديت كنحتارمو على التعامل اكثر كل نهار كنحس انه راجل مامخليني محتاجة لحتى حاجة لخبز هو الاخر ماكيصدقليش ديما قالي حتى تعلمي على خاطرك ولكن كيشري خبز السوق خبزي ڭاعما كيتكال كنلوحو لدجاج ،كيجيبلي كلشي ايلا أولويز كتجيب ليا صْطوك هادي حشومة ههه
ولكن بعد المرات كنشتاق لحياة لمدينة ،واخة هاد لعروبية ولات بحال لمدينة ولكن انا بعض المرات كيطيحو ليا بعض الزبايل لي كنت دوزت كنقول رانا دابا بيخير
كنتسناه ايمتا يجي باش نجمعو ايمتا يجي يعاود ليا على الجديد ،،،يعاود ليا حتى القديم !
وقرب الموسم ديال التبوريدة وقالي مغيبقاش يتغدى معايا ديما،،،غيبدا يهبط مع صحابو يديو الخيل يتبوردو … و انا مابغييتش آش غنبقا ندير
الجزء10
وليت كندوز نهار بوحدي وليت كنحس بلملل الشديد كنسالي الميناج ديالي وكندوز نريح،توحشت ماما وبابا،كنعيط مرة مرة كيجيو عندي وحتى كنولفهم وكيمشيو وديك اللحظة ديال فراقهم كتقطعني طراف طراف،كنحس بللي عندي ناس فحياتي غاليين بزاف
فاش جا عبد الرحمان بالليل قلت ليه باغا نمشي نسافر للرباط نشوف دارنا راه توحشتهوم
قالي صافي سخيتي وتوحشتيهم دغيا هه
بديت كنضحك : هه رانا موحشاهم ديما وبغيت نمشي ماكرهتش دابا للي يهزني ويحطني عندهم،،
قالي:صافي صافي غدا كنت باغي نديك معايا تشوفي لخيل ولكن حتى ترجعي غدا غنديك لرباط ولكن خصني نرجع ،ماكاين لي يرد لبال ل الدار والخيل ..
مشيت كنجري لبيتي جمعت لحوايج وكلشي صافي غدا انا غاديا !
وصلنا لدار عنقت ماما مزيآان وبقيت كنبوس ليها على راسها وسلمت على بابا
دخلنا وڭلسنا واحد الشوية وناض عبد الرحمان قالي :خصني نمشي نشد الطريق دابا باش نوصل بكري ان شاء الله،وايلا بغيتي اي حاجة عيطي ليا
مشيت تبعتو حتال لباب،معرفتش لاش ححسيت بنفس الاحساس فاش كنبغي نودع واحد من عائلتي،وماكرهتوش يبات،بقيت كنطلب فيه يبات واخا هدرنا واخا مايمكنش …..!
قالي:مانقدرش ومد ليا فلوس ف ايدي
قلت ليه علاش هادي ؟راك عطيتيني قبل مانجيو راه قاداني،،،
قالي لا خليهم عندك متعرفي تحتاجي ومتلقاينيش حداك
شفت فيه وهو كيضحك ليا،ماباغينيش نمد لبابا ايديا عنقتو قلت ليه :شكرا
هو تزنڭ وحتا انا تزنڭت معرفت كيف درت ليها ضسرت فديك اللحظة بقا كيشوف فيا سلم عليا ومشا!!
فرحت وسط عائلتي وحتى لحظة ماكانت كاملة ديما كيطيحلي فبالي،لقيت راسي كنهدر عليه ديما هو لي معمر كلامي ،،كنهدر …وكنعاود…كنتفكر المبدابزات والمخاصمات دياولنا …الضحكة هي الوحيدة لي كتعبر على ذكرياتي فالعروبية وعلى المواقف لي طحت فيهم
كان خصني نهدر معاه كل نهار،وكل مرة كيسولني واش خاصك شي حاجة نجيبها ليك،كنت كنقوليه ديما باراكا ماتكذب باش يبقى يحلف ليا و باش نجرلو لسانو وي قول ليا توحشتك الكلمة لي جاتني مستحيلة نخرجها مع فمي ونقولها انا ليه..
كان كيجيني من المستحيل نلقى شخص كيهتم بيا،كنقول هادشي ديال الافلام والمسلسلات واحد النهار غادي يطلع ليه الدم ولكن واخا كان كيطلع لعبد الرحمان الدم كان كيجي ويقولي سامح لي راه كنت مقلق ماقصدتش عندو تربية راقية تربية ماعمرني صادفتها فالمدينة و المدينة رمز الحضارة،،،
الجزء 11
الجو ولا مبدل عليا،هاد الجو ديال لمدينة ولا كيجيب ليا الشقيقة الم فالراس،الم الحنين لشخص قدر يخليني هاكدا بلامنحس، المدينة والحياة لي كنت عايشاها كانت مدوخاني،دابا كنستغرب كيفاش دوزت هاديك المدة وانا فالدار مع عبد الرحمان لاخروج لا صحاب
كنت غافلة على معنى الحياة،شايفاها من جيهة وحدة بصراحة كندم على وقت لي فات الرفقة الصالحة غلى من الدهب
كنت ناسية واليديا كنت ناسية طريق الله،ونسيت صلاتي ،،،ونسيت حتى وليديا
وانا كنتحاسب مع راسي لقيت ان الله رسل ليا معندو شخص ياخد بايديا
باقا كنعقل فاش كيبغي يصلي كيقولي غنمشي نتوضا تبغي نتسناك نصليو بجوج ولا تصلي بوحدك من بعد!،،كنت كنحشم نقوليه لا راني مكنصليش ،،ايلى حشمت منو هو آش غندير مع الله !!!!
بديت كنفكر فحالتي الوقت لي ماكنتش راضية على راسي وربي رزقني براجل ماكيضربش ماكيكميش ماكيشربش كيهتم بيا،،،لقيتني مقصرة بزاف وتعودت نصلي وراه
جا لوقت لي نرجع لدار،جامعة حويجي كنتسناه ،،جا وفرحت بيه واعدت راسي نهار نرجع نقاد لعشا انا وياه وندير داكشي ديال الرومنسية خاصة انني شريت كسوة خصيصا لهاد المناسبة
رجعت لدار وصلت عيانة قلت ليه نتكى شوية ونوض نطيب لعشا قالي صافي رتاحي وهو مشا يتفرج فالتلفزة
حليت عينيا لقيت راسي فالبيت لي كنبات فيه ،لقيتها العشرة ديال الصباح ،وبراد اتاي والفطور
نضت كندردڭ وكندور فالدار كيالحمقة ،،ضربتها بنعسة تال الصباح اودي على الرومانسية طفرناه بكري
صافي مدرناش السهرة لبارح نديرها ليوم
سيقت الدار،درت بيها دخلت لكوزينا قاديت كلشي ومشيت نقاد الماكياج والشعر باش نبان عليه
بقيت نتسنا واخا عييت حلفت مانتكى باش مايديني نعاس تعطل واه هادا مالو
طلعت لسطح كنطل،بان لي جاي على العود هو وشي صحابو وشي وحدين من عائلتو مابغاو ڭاع يتحفضو ليا سماياهم،،،جا دخل لقا كلشي فشكل،كيدور وكيشوف ،،
قال ليا: كاين شي عشا؟
انا بقيت مصدومة انا مابنت ليه ماكاين لا راك جيتي زوينة لا والو
خنزرت فيه وطلع ليا دم:لا ماكاين عشا!
بقا كيضحك: واخا شميت ريحت لحراق ،ماكاين مشكيل نبات بالجوع، هانية بقاي على خاطرك هانا مشيت نعس!
بقيت كنشوف فيه :يالاه سير مالك باقي واقف
بدا كيضحك:هانا غادي
انا: يالاه سير
هو: وهانا راه ساير،راني غادي بشوييية داكشي لاش كنبان ليك بحالا ماغاديش ولاكين راني غادي
طلع ليا دابا الدم : نتا كضحك عليا لاني من الصباح وانا كنوجد وعييت ومبغيتش نرتاح باش تجي وتبدا تستهزئ مني والله حتى حرام عليك وبداو كيتغرغرو ليا عينيا
عنقني مزيان قالي: شوفي فيا؟ وماتبكيش عآفاك هانا طلبتك راه بغيت نضحك معاك بنتي ليا ناشطة قلت نشطو هانا نغسل ايدي دآبا ونجي نتعشاو ونيت عاودي ليا اش حلمتي لبارح ههه
فرحت وبديت كنضحك ومع ماراضياش كنجمع الضحكة ولكن كتخرج ليا من الجنب
بدينا نتعشاو،قاليا :اه فكرتيني ناديا عافاك جيبي واحد الخبزة راه كاينة بالصاك لي كنت هاز جيبيها
انا طرا ليا لعجب كيفاش خبزة سولتو:آشمن خبزة؟ياكمة ماعجبكش هادشي !!!!
قالي:لا تي مالك راه واحد الخبزة لديدة طايبة على لعواد بغيتك دوقيها
نضت جبتها وحطيتها،يالاه بغيت ندوقها سولتو منين جبتيها وشكون عطاها ليك؟
قالي: كيشتي انا كنتغدى مع ولاد عمي وصحابي فاش كنديو لخيل وزكية كتجي مع الديات لي يجيبو لغدا وخلات ليا هاد الخبزة عند بالها باقا مرجعتيش
حطيت الخبز من ايدي بالنفخة:وشكون هاد زكية شنو كتصدق علينا الخبز ولا شنو خليت كلشي ونضت بحالي وانا غانتفرڭع
خليتو مصدوم جا عندي بغا يفهم لاش انا درت هاكداك
غدليه نضت فالصباح مخنزرة ماكاينش الضحك،كيضحك معايا ماكنضحكش معاه،كنجاوبو على قد السوال،و خلاني على خاطري مابقاش كيحكر،قبل مايخرج قلت ليه ماتغداش معند تا وحدة لا زكية لا الضاوية انا غنجيب ليك لغدا ونيت باش نشوف هاد زكية لي خرجات ليا فعودي البارح
الجزء 12
حطيت طرف الخبز من ايدي،واعصابي كلهم تحرقو،ودمي كنحس بيه كيغلي..وبدا كيفو ! واه يعني ضروري تخرج ليا شي حاجة من الجنب هاد الليلة المباركة مسعودة !
نضت ماكملتش لعشا مشيت دخلت لبيت ورْدَخْت ورايا لباب بالنفخة!
بكثرة الفقصة ندت كنمسح فوجهي هو مايستاهلش،وليت كنشك واش دارها لي بلعاني…
جا عندي سمعت دقة خفيفة على الباب : ناديا خرجي نهدرو مالك!آش كاين!
مابغيتش نجاوبو مابغيتش نهدر معاه مابغيتش نشوف فيه!
مسحت جوج دمعات لي بقاو معقودين فعينيا وصرطت البكية وخجت حليت واخا مابغيتش..
حليت ليه الباب وانا منفخة وهازا راسي لَسْما : نعام آش بغيتي!!
شاف فيا،دار ايديه على فمو جمع الضحكة …خشا ايديه فجيابو وتّكَا على الباب
اول مرة كنشوف عينيه الهايمين،عاق بيا غرت من للي سميتها زكية ولا شسميتها،قالي: فخبارك ماعرفتش لاش كتبقاي ديري هاكدا،راك كل نهار حال وعقل،دابا قولي ليا آش كاين باش حتى نعرف آش خصني ندير،،!!!
انا عآد ما زاد طلع ليا دم تفو هادا بارد فيه الدم انا شاعلة فيا العافية وهو مهنية عندو القضية واش على الاقل كيديها فيا؟؟
سولتو :علاش تشد معند هادي السيدة الخبز؟ولا اجي بعدا كيعجبك خبزها؟
جاتو فشكل نسولو بعصبية كنخليه فهاد المواقف غير كيشوف : قالي واش غنقوليك الله يعطيها الصحة داك الخبز عندها واعر قلت نعطيك دوقيه
نآآري على المْخورجْ ،هادا كيتصطا عليا واش بغا يلقا فيا غير الشياط؟ انا قررت مانبقاش نجاوبو خليه
ماعودتش الهدرة ،شديت فالباب وبديت كندفع فيه،سير الله يرحم باك بغيت نْعَس
فاش درت ليه هاكداك ماحملش حْدَر راسو وقالي:تصبحي على خير
بقيت انا كنعوج فيه :اه تصبحي على خير بالفقصة سمعتو قالي بالغوات وسيري نعسي وبراكا عليك تخلعت ايصحابلي ماسمعنيش
الغد ليه نايضة محيحة كَنَرْدَخ عليه فالطباسل وفالصينية وفالكيسان،وهو مايديهاش فيا،فاش بغا يخرج،تبعتو لباب بالنفخة دائما:غنجيب ليك لغدا غنجي مع مرات ولد عمك زهيرة ماتشد لغدا معند حتى وحدة !
قالي:ماتجيش،الطريق بعيدة عليك…
تما انا دخلني الشك باغي يتلاقى معاها وياكل خبزها والله لاكانت ليكم،قلت ليه لا غنجيو
كيف مشا مشيت كنجمع فالدار ،ساليت الميناج ومشيت عند زهيرة قلت ليها رانا غاديا معاك،ضحكات وقالت لي هيا صافي طحتي فيه الزغبية،انا ماعجبتنيش هدرتها واخا بصاح وعاقت بيا،جوابي كان ضحكة وتزنيڭة
وحنا غديين فالطريق قلت نجبد الهدرة على هاد زكية البارح مدانيش نعاس ليل كامل وانا خدامة نفكر …
سليت ليها لسانها :قالتلي ايوا زكية بنت خالو راك عرفتي راجلك وراجلي هوما خوت كثر ماهوما ولاد لعمام،كان قاليا راجلي بلي عبد الرحمان كان باغي يتزوجها،،وحتى هيا ماخفت نكدب كانت حاطة عليه لعين!
انا قطعت لحس تقطع ليا اللسان والقلب والكبدة والرية وشوية ماغتقطع ليا حتى النفس
ياك ونتا جايب ليا معندها الخبز وفرحان وكضحاك ،،لا لا صافي نهار نهارو
وصلنا لقيتو كيربط فالخيل وجاي
قالي:السلام وصلتي! هه عييتي
خنزرت فيه :الحمد لله اجي تغدى
ڭلس وڭلس حداه ولد عمو حطيت ليه لغدا،ايوا تمو جايين شي عيالات بقيت نطلع ونزل فيهم
جات كتسلم سلمات عليا بالنفخة والتعفار،سلمات عليه باليد وكتهدر معاه وكضحك ليه
قدامي ناضت قالت ليه: سي عبد الرحمان كيف جاك الخبز تبارك الله ماكيخليش فيه
ناري كيدايرة وناري كيكاتهدر بففف وشدوك الحوايج لي لابسة ولاش دايرة داك الكحل كامل فعينيها
انا ڭالسة مع العيالات حدا الرجال نقزت جاوبتها:والله اختي ماكليناه بقا تال الصباح كارم لحناه لدجاج
وضحكت ضحكة ديال عطيتها العصير
سكتات وتعقدات وشافت فيه : سمح ليا وزادت فحالها
وانا شحال فرحت ديك الساعة ههه قلت ليها بالجهد بسلامة اختي
دار عندي عبد الرحمان :ماغتسكتيش؟
كانت اول مرة كيهدر معايا بديك الطريقة وقدام كلشي وهي سمعاتو
قلت ليه:مالني آش قلت علاش غنسكت قلت شي حاجة فيها العيب!
شي وحدين بداو كيضحكو وشي وحدين كيڭولو يالاه ماوقع والو،،،
قلت ليه:مالني آش قلت علاش غنسكت قلت شي حاجة فيها العيب!
دار فيا واحد الشوفة :راه ڭلت ليك سكتي !
انا اصلا طالع ليا الدم،ومحلفة عليه طلعت ڭروني :ياك كتقولي سكتي ،ليا انا ؟و انا جايبة ليك لغدا!! راه هيا لي خاصها تبعد علينا وتمشي تقلب ليها على راجل فجيهة وحدا اخرى!
ناري قفرتها هاديك الساعة ناض وقرب لوجهي لدرجة اني كنسمع وكنحس بالانفاس ديالو :آخر مرة كنقولي سكتي،زيدي كلمة وحدا اخرى وغتفرجي!
تخلعت وتصدمت وبديت نبكي ليه :كتجي عليها هيا انا جايبني مكرفصة معاك هنا والله ماكتستاهلني،تميت غدية،ناضو لي تما كيهضرو وكيلعنو فالشيطان
عطيت ليهم بظهري وبقيت غاديا معرفتش واش هيا الطريق لي جيت منها ولا لا،ماعرفتش واش غتوصلني للدار ،للبيت لي غنسد عليا فيه ومايشوفني حتى حد وانا كنبكي على زهري !
سمعت شي حد جاي من ورايا،سمعت خطوات ديال الخيل حسيت بلي هوا..عيط ليا وتاكدت انه هوا؛؛؛
بديت كنجري باش مايوصلنيش مابقاتش بيناتنا هدرة هاد المرة مغنسمحش ليه ….
الجزء 13
بقيت غادية وماعارفاش الطريق،المهم انني نبعد على الناس والجماعة لي كانت تما،ونبعد على عبد الرحمان،،الآماللي علقتهم عليه والاحلام لي رسمتهم معاه والمستقبل لي تخيلتو لينا حنا بجوج…كلشي مشا وكرهت نفسي على الوقت لي ضيعت كنفكر فيه
جا بالخيل ديالو تابعني :ناديا مكتسمعيش راني كنهدر معاك
انا غاديا معصبة وحالتي ولات حالة كنجاوبو بالبكا:بعّد مني،بغيت نبقا بوحدي
جا نْطَر لي ايدي بالجهد ووجهو مرسومة عليه علامات الغضب:فاش نقوليك وقفي هيا وقفي،راني كنهدر معاك
وقفت ؛ ودرت عندو : بعّد مني مابغيتش نوقف مابغيتش نشوف وجهك ماحاملاش نهدر
ماجوبنيش،جرني لحدا الخيل نهض فيا : يالاه طلعي دابا
انا بديت كنتركل وكنجر ف ايدي : بعّد مني واش ماكتفهمش ؟طلقني مابغيتش نمشي معاك
هزني وحطني فوق الخيل دور راسو : ماشي هاديك هيا الطريق..
رجعنا لدار،كيف حليت الباب دخلت وڭلست بالنفخة ،شعلت التلفازة وعليت الصوت
جا تبعني وطفا ليا التلفازة: راني كنهدر معاك،كنهدر مع الحيط ولا؟ّانا باغي نفهم مالك اليوم درتي ديك الحالة؟
مكنجاوبش ،جريت مخدة وتكيت وعطيت ليه بظهري وعطيت لوجهي للحيط!
تما عاد فين تعصب كثر : ناديا نوضي وباراكا عليا من الفشوش ديالك ماتلا عندي ليك صبر،،نوضي ودابا!
درت عندو شفت فيه بنص عين: شناهيا ؟ انا كنتنفخ؟! ايوا سير عند لالة زكية هي لي مكتنفخش
سكت وبقا كيخنزر فيا:آش هاد الهدرة لي كتڭولي
رجعت لبلاصتي تكَوّرْت فيها : داكشي لي كتسمع!
قالي: شوفي آخر مرة نكون كنهدر معاك ونتي كتنخليني دوري وهدري معايا
نضت
الجزء الأخير
نضت نيت انا بغيت نعرف آش غيقول ليا: هانا آش
شاف فيا : بغيت غير نعرف علاش درتي ديك الحالة قدام الجماعة حيحتي ومحترمتيش البنت وهيا مادارت ليك والو،شنو دابا غتندمينا على الخبز لي عطاتنا
وهو كيدافع عليها بقيت كنشوف فظفاري و ايديا بحالا ممدياهاش فيه لاني فعلا ماكنتش باغا نسمع لهدرتو: ساليتي؟
شد لي ايدي بالجهد : راك كتعصبيني بهاد الفعايل لي كديري،فوتي عليك زكية ولابـــ …
قطعتو بالغوات: ايلا كانت باقا عاجباك سير تزوجها هيا للي تليق ليك،سير عندها دابا آش كتسنا،ياك كتبغيها وكادافع عليها هي حسن مني
قالي: نعاود نسمع هاد الهدرة مرة اخرى ماغيعجبكش لحال سدينا هاد الهدرة
انا عاد ما شعلت وبديت كنغوت قلت ليه هدرة خايبة هدرة قبيحة هدرة قاصحة …هدرة قصحاتو فقلبو
i
عايرتو باصلو عايرتو ببلادو بعائيلتو كنت معصبة وحاسة براسي بوحدي لا وليديا حدايا لا حد يوقف معايا،كنت خايفة من نهار بحال هاكدا…
هز ايديه وهددني بلي غيضربني ايلا مسكتش…مكنتش خايفة عطيت ليه وجهي : ضربني لقيتيني بوحدي هنا باغي تحڭر عليا،ضربني …
هبط ايديه ،وبقا كيشوف فيا
قلت ليه: كون ماكنتش انا كون تزوجتي بيها هيا
قالي : كون ماكنتيش نتي حتى وحدة ماكانت غتكون نتي !
تصدمت فاش سمعت جوابو،مكنتش عارفة آش خصني نقول بقيت كنشوف
جا قرب ليا ايصحابلي بغا يضربني ولا يجبد ليا لودنين على الهدرة لي قلت ،؛
قرب ليا وعنقني مزيان،حتى تزَيّرْت وعجبني الحال،قالي : كتسمعيني
ضحكت : كيفاش كتسمعيني؟؟ اه كنسمعك
قالي:لحقاش بغيت نقوليك هدرة سمعيها مزيان باش لاباقاش تقولي ليا عاودها
قلت مع راسي ناري حتا تقادات لقضية وفعيواض مايقولي كل نهار كليمة زوينة غادي يقولها غير مرة وحدة، ناس عندهوم سبع ايام ديال لمشماش وانا عندي نهار ومن بعض ماكاين غير الضرڭ ولا شنو؟
ولكن يالاه اللهم يقولها ولا نبقاو نجري عليا نجري عليك ومعلقين
قلت ليه :آه كنسمع
قالي: مانبغيكش تعايريني باصلي، ولا تعايريني بانني عروبي،مانبغيكش تزايدي مع الناس لي كبر منك فالهدرة،وفاش نكون نهدر معاك تسمعي ليا
الصراحة عندو الحق هادو ديفوات فيا،خاصني نبدلهم
عتاذرت ليه،قلتلو سمح ليا،،وكنتسنا يقولي داكشي لي كنتسنا
قالي:يالاه قادي لينا شي اتاي يكون زوين
مشا ڭلس وخلاني واقفة ايوا شفتو ماقال والو،اويلي نبقاو هاكا
مشيت عندو جمعت الشجاعة ديالي وقلت نسولو
قلت ليه واش منسيتي والو؟
قالي :لا آه اجي اجي نيت فكرتيني،مشيت عندو ڭلست حداه وانا حشمانة
قالي:وحيدي منك الغيرة راه عارفك كتبغيني وكتغاري ومنوضة لحيحة على ودي
بدا كيضحك، خنزرت فيه ؛: ناري حاس براسك شكون قاليك انا لي غيرة عليك هاديك ماشي لغيرة بقيت كندخل ونخرج فلهضرة
خلاني كنبرول وهوا كيتفرج فيا ويضحاك مع راساتو:ايوا آش غندير دابا انا كنبغيك ايصحاب لي حتا نتي كتبغيني ولكن ماكاين مشكيل نوضي قادي اتاي على ود انني كنبغيك ولا منستاهل
انا نهار كيحصلني كَنْكُر كلشي: شنو انا كنبغيك ؟ لا لا هههع جاب ليك الله
عنقني عوتاني وقالي:الله يهديك علينا وصافي
قلت ليه:آه صافي كنبغيك حتا انا ودرت زعما راه عادي
دخلت لكوزينة فرحانة،بقيت كنقز هنا ولهيه وفرحانة ماشفتش واحد المقراج كبير كان فالارض ضربتو برجلي جا كيجري لقاني مكروعة فالارض وكنضحاك وفرحانة
بقا كيضحك عليا: واش نتي ڭلنا ليك كنبغيك نضتي كتنقزي ايلا قلت ليك كنتسطا عليك غتموتي واقيلا
حشمانة فبلاصتي غطيت وجهي بايدي مقدرت باقي نشوف فيه
جا هزني بحال الريشة،نزلني فالصالون قالي تفرجي فالتلفازة ايلا خليتك فلكوزينة هاد الليلة تريب علينا هه
مشا يقاد اتاي لينا بجوج دخل لكوزينة وتبعتو كنطل عليه،عيني هاداك النهار باقا كنعقل مابغيتش نبعد منو ههه
لوقت كيدوز،وكل نهار كيتزادو لحظات فحياتنا،نقدرو حنا انا وياه خططنا ليهم ولا يجيو صدفة،لحظات حلوين،كتعيشهم مع الشخص المناسب،الشخص لي قبلت بيه بالخيب والمزيان لي فيه لي تواعدت انا وياه باش نعيشو حياة نتقاسموها بالمرة ولحلوة ،،،زوج رضيت انه يكون من العروبية لانهم لو خيروني بينو وبين اي كان كنت ديما غنختارو هوا لانه ختارني انا
لانه عبد الرحمان زوجي ألّي من العروبية
