قصة أحببتك مرتين - الجزء الثاني
الجزء الثامن
متسناش ضميري نحط راسي على الوسادة باش يبدا الخدمة. غير
ركبت فالسيارة وهو يبدا يولول ويضرب فحناكو ويعاير فيا على شنو درت. دارلي واحد
التصبينة فاعلة تاركة. غير وصلت للدار دخلت بالزربة للبيت وسديت عليا. وجلست شديت
فراسي وبديت كنعاير فراسي شنو درت. كيفاش قدرت ندير داكشي؟ علاش ضعفت قدام الجرح
ديالي وخليتو يدير ما بغا. فين مشات الحشمة
والاستقامة. شنو غيكون كيفكر دبا.
غيقول بلي انا ماعندي كرامة،....... فالصباح فقت بكري على الدقان فبيتي، مامولفاش
كيدق عليا شي واحد، تخلعت ونضت كنجري فتحت الباب وانا مزالة كنشوف جوج من الحاجة،
لقيت شي واحد واقف قدام الباببديت كنعوج فوجهي باش نركز مزيان فيه، بدات الصورة
كتوضاح ولقيتو كيشير وهو مبتسم_شنو كاين على الصباح_يالاه راه كنتسناوك تمشي
معانا_شكون نتوما؟ وفين؟_غتخرجي معانا دوري شوية....يالاه راحنا كانساينو فيكمشا
وخلاني مزالة مصدومة دخلت تصحصحت او وجدت راسي ونزلت عندهوم.مقدرتش نعاود نشوف ليه
فوجهو ولكن هو كان طبيعي وماعلابالوش بلي وقعات شي حاجة البارح، ابتسم لي بطريقة
عادية وكمل شغالاتو، كان كيشوف السيارة واش واجدة، طلعت مع نفس الناس اللي وصلوني
فالطريق. تعرفت عليهوم كانو ضريفين بزاف ومطلوقين. جاو من بدينا الرحلة. معرفتهومش
فين ماشيين. وقف المرشد السيارة فجنب الطريق. وخرجنا. هزو صيكانهوم ودرنا صف
تابعين المرشد. طلعنا فواحد الجبل وحنا كنهدرو حتى وصلنا للقمة. بدات كتبان لينا
السما قريبة والارض كروية. بقينا جالسين كنرتاحو . عاد كملنا الطريق. دخلنا بين شي
شجر حتى خرجنا فواحد الشلال. كان شلال صغير ولكن رائع وخلاب. بقينا غير حالين فمنا
فيه. دوزنا نهار زوين فالجبل. وفالعشية رجعنا هبطنا للشاطئ. مشينا لواحد المخيم
كانو دايرين سهرة تماك. فساحة المخيم كانو دايرين منصة ولكن حادرة معالياش.
ودايرين بيها زرابي ووسايد. جلسنا حدا الناس وتسنينا يوصل الوقت باش تبدا الفرق
الغنا. فالاول تفرجنا فشي دراري دايرين مجموعات وكيتنافسو شكون اللي يفك الالغاز.
وعاودولينا النكات وغناو. بدا الليل كيطيح. تشعلو الضواوات وبرد الحال. طلعات
الفرقة للمنصة. كانت المغنية الرئيسية لابسة الاسود وشعرها بني طويل ومخرص. كانت
بحال شي غجرية. كانت لابسة أساور فيديها فاش كتحركهوم كتخليك تتبع يديها وتتمايل
معاهوم. أما صوتها. فكان بحال ايلا غادي فشي غابة وكتسمع صوت الما من بعيد ماحدك
كتقرب وهو كيجهاد. كان صوت عذب كيوصل للقلب ديالك ويشعل فيه جميع الاحاسيس وكيخليك
باغي تبكي. كانت كتغني بألم على شي واحد. كانت كتقولو بلي كان فرحان وكان ديما
ضاحك وناشط وكانت الدنيا كدور عليه. ومن بعد بشوية بشوية بدا كيبعد وبقا وحيد.
قالتلو بلي هي فاهماه. وبلي احزانو وصلوها وبلي دموعو غرقوها وكتقولو صافي صافي
باركة عليه. مداتلو يديها باش يرجع للحياة ولكن رفض وبقا عايش فالقفص اللي بناه
ليه.
التتمة
سالات الاغنية.صفقولها الناس بحرارة وبتأثر. نزلات بسرعة
من المنصة وطلعات مجموعة ديال الدراري ديال القرية كيغنيو الطرب وغناو قصيدة
المنفرجة. غناوها بطريقة زوينة. من بعد بداو كيطلعو فرق مختلفين. ولكن حنا نضنا
نمشيو بحالنا حيت عيينا. رجعنا للدار ودخلت لبيتي وانا فرحانة. لقيت ماما خلاتلي
ورقة فبيتي قالتلي بلي أم أمين خرجات من السبيطار وداوها للدار. بغيت نمشي نسولها
كيبقات ولكن غتكون ناعسة. بقيت متفاجأة كيفاش نسيت الموضوع وكيفاش داز النهار
بلامانفكر فأمين وبلاميطيح فبالي ولو مرة وحدة. اتكيت بلاصتي وانا فبالي بلي فالغد
نمشي نشوف خالتي. اتكيت وانا حاسة براحة وفرحة من مدة ماحسيت بيها. كان النهار
زوين بزاف. رجعت تفكرت بلي مشكرتش المرشد على النهار اللي دوزت بفضلو. طليت من السرجم
باش نعيطلو ولكن معرفتش سميتو. رجعت خرجت من بيتي ومشيت دقيت عليه. فتح الباب دغيا
يعني مكانش ناعس. _ياك لاباس_غير بغيت نقوليك شكرا على هاد النهار _العفو_وحتى على
البارح_مرحبا_ممكن نعرف شنو سميتك_يوسف _متشرفين. انا جهان_اه عارف. يالاه تصبحي
على خير_تلاقي الخيررجعت دخلت لبيتي وسديت الباب. مديتهاش فيه واخا تعامل معايا
بلؤم ولكن انا اللي دقيت فوقت ماشي مناسبفالصباح فقت بكري باش نمشي نشوف خالتي.
لقيت ماما فاقت وجالسة كتكتب شنو خاس للدار.سالات وخرجنا ولكن مشات لواحد البيت
كنجمعو فيه داكشي اللي قديم. كانت بغات تهز واحد الكراسى باش تديهوم لواحد الفنان
كيعجبو يجدد الأثاث ويزيد عليه لمستو الخاصة. فاش دخلت لداك البيت لقيت بزاف ديال
الحاجات اللي فكروني فالطفولة ديالي. ولقيت شي لوحات كنت رسمتهوم ولكن بقاو مخبعين
تماك. هزيتهوم خرجتهوم وحطيتهوم حدا الباب حتى نرجع وندخلهوم لبيتي. شافهوم بابا و
هزهوم هوما والصندوق ودخلهوم للبيت. وعلق اللوحات فأرجاء الدار. بقيت كنشوف فيهوم
وانا حاسة بالافتخار ولكن بابا كان حزين شوية_مالك مقلق؟_شحال وانتي حارمانا من
هاد الفن. _اشمن فن. مزوينينش_التواضع سعما. بالعكس زوينين بزاف كيفكروني فجهان
ديال شحال هادي. جهان المليئة بالنشاط والحيوية وبطبيعة الحال المشاغبة اللي
هاربالها الريح بالقفةابتسمت ورجعت تفكرت النهار اللي قررت نوقف فيه الرسم. قطعت
علاقتي بهوايتي من اجل الدراسة. باش نقرا مزيان ونجتهد ونكون حتى انا بحال أمين.
ضيعت شحال من حاجة على قبلو. ودبا سمح فيا ومن الفوق عايرني. وفجأة قررت نرجع
نتصالح مع الهواية ديالي ونرجع نحاول نعيش الحلم ديالي نكون رسامة مشهورة. مشينا
للسوق تقدينا وشرينا شنو خاس وانا شريت الالوان والمعدات ديال الرسم. دزنا عند
خالتي من حسن حظي ولا منعرف من سوء حظي ملقيتش أمين فالدار. عنقت خالتي وبكينا
شوية وعاتبتها علاش خلعاتنا وهي اعتاذرات على شنو دارت. فاش رجعنا للدار هزيت
داكشي اللي شريت ومشيت وسط الجنانات حتى وصلت للبلاصة فين كنت كنرسم شحال هادي.
حطيت المحمل تماك وعلقت عليه اللوحة . وبقيت كنشوف فيها وكنفكر شنو رسم. قررت نرسم
راسي. نرسم جهان اللي كان كيتكلم عليها بابا جهان الفرحانة والسعيدة. بقيت كنرسم
ولكن فالاخير لقيت راسي رسمت جهان حزينة بزاف وباين فعينيها بلي مكسورة. قررت
نتبدل ونتشافى ونرجع كيف كنت من قبل أمين
الجزء التاسع
دازو ايام وانا مهتمة براسي وكنحاول ندير ما أمكن باش
نتبدل وننسى شنو دار فيا أمين. وبطبيعة الحال يوسف عاوني بزاف. وقربنا من بعضياتنا
بزاف. كنا كنخرجو ندورو فالمدينة ونهدرو ونتجمعو وينصحني ويحاول يخليني ننسى. كان
كيعاوني باش نكون فرحانة وهو فنفس الوقت كان حزين. حتى هو قلبو مجروح. كيتمنى يقدر
يضحك ولكن شحال من مرة حاول وفشل.كان كيبغي شي بنت ولكن امكن ماتت على حسب مافهمت
من كلامو. مكيبغيش يحكي بزاف. وايلا هضر كيكون كلامو غامض. ربما الحزن هو اللي
خلانا نتفاهمو. حيت الهدوء اللي كان خلاه فينا الحزن هو اللي خلانا نتفاهمو. ايلا
كنتي حزين مغتحملش يكون حداك شي واحد كيطير من المقلة وكضحك وينشط. وغتفضل واحد
ساكت غير كيتأمل. فالاخير عيينا . نسيت شنو دار فيا أمين ولكن منسيتش بلي كنبغيه.
ولينا كندوزو اغلب وقتنا فالبحر بالعشية. حيت قريب للدار. غير جالسين وكنشوفو
فالبحر مكنهدرو ما والو. حيت عرفنا بلي فشلنا اننا ننساو وخلينا الوقت هو اللي
يحكم. كنا كنشعلو العافية وكيجيو عندنا شي دراري تعرفنا عليهوم مخيمين تماك قرابين
لينا. وكنجلسو سهرانين وكنغنيو ونتعاودو على الحياة والاحلام وعمرنا هدرنا على
الماضي والذكريات. اخر نهار غيدوزو يوسف هو والمجموعة ديالو عندنا مشي انا وياه فالعشية
للشاطئ بحال ديما. ماكانوش دوك الدراري امكن كانو مزالين فالمدينة. شعلنا العافية
وبقينا غير حنا بجوج. بقينا كنهدرو حتى دازو شي مخازنية وطلبو منا نطفيو العافية
ونضفو الشاطئ فاش نبغيو نمشيو. اقترح عليا يوسف نطفيوها ونبقاو فالضلام احسن.
طفيناها وبقينا فالظلام. خفت يجيني البرد وعطاني يوسف جاكيطتو نحطها على كتافي.
فجأة كيبانلي شي واحد وقف حدايا ومادلي يدو. ومع الظلام معرفتوش عقلت غير الريحة
ديالو_أمين؟_بغيت نهدر معاك. نوضي_علاش؟ _شي حاجة مهمة.شديت فيه ووقفت. خفت تكون
خالتي واقعة ليها شي حاجة. بقا غادي وانا تابعاه وخلينا يوسف جالس._شنو بغيتي راه
خليت يوسف بوحدو_يوسف؟ مكتحشميش؟ _علاش؟_شنو كنتو كديرو؟ ولا شنو كنتو غديرو لوكان
متدخلتش. _وعلاش تدخلتي؟ كون غير بقيتي حتى تعرف وتحايد الشك. _مكنتش نحتاج نشوف
عاد نعرف. حيت عارف. كنتو غديرو بحال داك النهار _شنو كتقول؟_ديك الليلة وانتوما
معانقين. بغيتو دبا تكملو على فاش بقيتو_ملي عارف علاش مصدعني فراسيخليتو ومشيت
عند يوسف لقيتو كيضوي بتلفونو وكيغطي الرماد بالرملة. _ياك لاباس_والو باس. _باش
عرفنا هنا؟ _معرفتش_هههه جاتو الغيرة_الله يهديك...... سعما؟_باينة_حلف _واراه
باينة علاش غنحلفرجعنا للدار وانا كنفكر وكنسب فراسي علاش تسرعت وقمعتو ماخليتوش
يهدر. كون راه اعترف بلي جاتو الغيرة وبلي كيبغيني. ولكن غيكون مالقاش ديك البنت
ورجع يقلب عليا. دبا انا صدقت محطوطة فالاحتياط._سيري تنعسي ومتبقايش تفكري بصوت
مسموع
دخلت لبيتي وانا حشمانة حيت سمعني يوسف فاش كنفكرفالصباح
فقت على الدقان فبيتي. عرفتو يوسف اللي بغا يتوادع معايا ونزلت ودعتهوم كاملين
وانا حزينة بالخصوص على فراق يوسف اللي كان نعم الصديق ونعم السند ربما كان هو
الاخ اللي ماعنديش.مشى يوسف بحالو وخوات عليا الدار. مالقيت مندير ومالقيت معامن
نهدر ومعامن نضحك. وخرجت مشيت للبحر نريح بوحدي وندوز الوقت. بقيت كنتمشى و كنشوف
فالمواج ومقدرتش نفهمهوم مرات كنحس بيهوم كيتعانقو وبعض المرات كيضاربو. مرة
صوتهوم كيكون قوي وعالي ومرة كيكون خفيف ومنساب بحال شي معزوفة كلاسيكية. هزيت
راسي شفت جهة الدار وشفت بلي معلقين الراية. كانت الراية كتعني بلي وصل الوقت ديال
شي وجبة. واكيد وصل وقت الغدا. فاش كنت صغيرة مكانتش ماما كتقدر تهبط عندي تعيطلي
وكنت كنعرف وقت الماكلة من الراية. طلعت للدار تغديت ومشيت لبيتي باش نرسم. بقيت
مقاتلة ماجاتني حتى فكرة فراسي وتفكرت الشلال اللي مشينالو وقلت مع راسي بلي غيكون
افضل مكان للالهام. هزيت السيارة ديال بابا ومشيت للشلال. حبست السيارة جنب الطريق
وهزيت الصاك ديالي وطلعت للجبل. بقيت طالعة حتى وصلت للشلال. كنعترف بلي خفت حيت
بوحدي ولكن جمال الشلال طغى على الخوف. وقررت نرسم الشلال نيت . بدات الشمس كتغرب
واللوحة مزال ماكملاتش. عاد بداو كيبانو الملامح ديالولها. كان خاسني نرجع. جمعت
المعدات ديالي وهزيت اللوحة وبغيت نرجع فحالي ولكن تلفت على الطريق. كان الشجر
كثيف ومتشابك والاماكن متشابهة. حاولت نضبط اعصابي ولكن مع المحاولة الرابعة قلبي
بدا كيضرب وتعصبت وفنفس الوقت خفت. شنو غيوقعلي فهاد الغابة؟ فقدت اعصابي بديت
كنترعد وكنبكي. مبقيتش قادرة نفكر. جلست فالارض وشديت راسي وحاولت نركز مزيان. حيت
مخاسنيش نضيع الوقت وخاسني نخرج قبل ماتغرب الشمس. الحمد لله تفكرت بلي فالقرية
اللي حدانا كيصب الواد فالبحر. وقررت نتبع الما باش نخرج فديك القرية. تبعت الواد
وانا كنجري ومع كل خطوة كيكبر الامل ديالي اني نخرج ولكن فجأة لقيت راسي فبلاصة
كيتفرق فيها الواد ومعرفتش منين ندوز. فكرت دغيا وقررت نعاود نطلع للجبل ونشوف
منين ندوز. طلعت لراس الجبل وبانتلي واحد الجهة كتمشي بعيد وقررت نتبع اللي غادي
لجهة البحر. غير غربات الشمس لقيت راسي كنشوف الرملة وبديت كنضحك وكنغوت بحال ايلا
كنت فبرنامج هروب ماكر. وصلت للشاطئ وملقيتش كيفاش نمشي للدار وقررت نتمشى مع
الشاطئ حتى للقرية. دوزت ساعة وانا كنمشي جنب البحر وكنضوي غير بتلفوني. واخيرا
بانتلي الدار شاعل فيها الضو. فرحت ومشيت كنجري. دخلت لقيتهوم مقلقين ولكن غير
شوية حتى عرفو شنو وقعلي عاد تخلعو. وفاش سولينو على السيارة مالقيت ماندير وقلت
بلي خليتها فالخلا. _دبا شنو غنديرو_غنمشيو نجيبوها. ميمكنش نخليوها فالخلا_وكيفاس
غنديرو_نمشيو على رجليناخرج بابا وتبعتو وبقينا غاديين على رجلينا مسافة طويلة عاد
وصلنا. كانت امكن وصل منتصف الليل. وصلت مهدودة ماعنديش الرجلين علاياش نوقف. ولكن
ملقيناش غير سيارة وحدة لقينا جوج سيارات_هادي السيارة ديال أمين!_شنو كيدير
هنا؟وفين هو دبا؟
لجزء العاشر
فين غيكون دبا؟_واش دخل للغابة يقلب عليا ؟ وشحال من
ساعة وهو هنا؟ ياربي تحفظو وماتكون واقعالو حتى حاجة. هزيت تلفوني من السيارة لقيت
بزاف ديال الاتصالات من أمين. اتصلت بيه ولكن مكيشدش لي الخط.ناض بابا دخل للسيارة
وشعل الضو وضوا فالجبل وبدا كيكلاكصوني. ماعرفناش شنو نديرو. وقررنا نتسناو حتى
يرجع ولا منعرف. بقينا جالسين فالسيارة حتى شفناه خرج من الشجر وكان سخفان ومخلوع.
جا كيجري عند السيارة وتلاح قدام الزاج. شاف فيا وطاح جلس فالارض._أمين مالك؟ شنو
وقع؟_كنت...كنت خايف عليك...فين مشيتي؟_كنتي كتقلب عليا؟ _صافي خليه من الهدرة.
ماشفتيش كيفاش سخفان. يالاه نديوه للدار._وخا انا نوصلو للدار_وفاش ترجعي؟ يالاه
نديوه معانا واتصلي بخالتك قوليلها ماتقلقشهزو بابا عاونو يوقف حيت كان سخفان
وركبو فالسيارة ديالنا ومشى. وانا ركبت سيارة أمين وتبعتهوم. كنت خايفة عليه بزاف
حيت تقريبا ثمنية ديال السوايع وهو هنا فالجبل كيقلب عليا.وصلنا للدار. طلعو بابا
ودخلو لبيتي حيت الغرف الاخرين عامرين.خلاه يرتاح وانا وجدتليه شوربة ياكلها باش
يرد القوة ديالو. طلعت للبيت عندو لقيتو جالس شاد راسو. غير شفتو قلبي بدا كيضرب
وتزنكت حيت غادي يبات معانا فالدار. وحيت حسيت لاول مرة بلي الغرفة ديالي ولتا
حميمية ودافئة. كنت ديما كنحس بيها خاوية وباردة. _ اتكى باش متعياش. وهاك شرب هاد
الشوربة باش ترد الروح_شكرا_لا بالعكس شكرا ليك انت_هانية هذا واجب_خدا من عندي
الزلافة وبدا كيشرب. _كي درتي خرجتي من الغابة؟ تلفتيلي_كنتي تابعني؟_اه_تبعت
الواد حتى خرجت للشاطئ ورجعت طلعت للدار_مكانش كيسحابلي ذكية لهاد الدرجة. اتصلت
بيك وماكنتيش كتجاوبي. مقلقة مني؟_لا خليت التلفون فالسيارة. خلي الهدرة دبا
وكول_بغيت نهدر معاك عاد ناكل. جلسي(شدلي فيدي وجلسني حداه) حسيت بقلبي رجع للحياة
وعاوتاني بديت كنتخيل السيناريوهات وكنختار ردة الفعل المناسبة._وخا انا
كنسمع_بغيت نعتذر على داكشي اللي وقع_شنو اللي وقع؟ ممكن تحدد. حيت انا وياك
مكنتفاهموش وكنفهمو غلط. اذن عاود قولي شنو وقع بالضبط _بغيت نعتذر على داك النهار
حيت طلبت منك تلغي العرس وعايرتك واتهمتك بالنفاق. واتهمتك بلي حاولتي تشريني. هاد
الايام دازو صعاب عليا بزاف. توحشت الصداقة ديالك كنتي صديقتي وبجنبي ومعمرة عليا
وانا مادرت فيها مايتشاف. عافاك سمحيلي. _الله يسامح_من قلبك؟_من قلبي_شكرا بزاف.
كنت عارف غتسمحيلي حيت قلبك حنين. واش ممكن نرجعو كي كنا_بطبيعة الحال_صافي دبا
غناكل. تصبحي على خير_(صافي؟).....وانت من اهل الخير
رجت وسديت الباب. عاوتاني تأملت اكثر من اللازم. صافي
كان باغي غير يعتذر وصافي. دخلت لبيتي باش ننعس ولكن مجانيش النعاس. بقيت كنتقلب
فبلاصتي. ونضت وقفت فالسرجم تاني. نهدر مع القمر ونشكي عليه. بقيت كنفكر حتى بدا
الظلام كيخفاف وانا مزالة فايقة. عجبني داك الجو وخرجت نتمشى.علاقتي وطيدة بزاف مع
البحر هو اللي كيخليني نرتاح ونرجع لحالتي الطبيعية. كنت حزينة حيت كنبغيه بزاف
واللطف ديالو كيآذيني كيما كتآديني حتى القسوة ديالو. وبطبيعة اللي كيألمني أكثر
اني مزال مانسيتو ومزالة كنبغيه وماعنديش أمل فالمستقبل نكون معاه خلاتها فيروز
فاش قالت أهواك بلا أملأهواك بلا أمل و عيونك تبسم لي و ورودك تغريني بشهيات القبل
أهواك و لي قلب بغرامك يلتهب تدنيه فيقترب تقصيه فيغترب في الظلمة يكتئب و يهدهده
التعب فيذوب و ينسكب كالدمع من المقل في السهرة أنتظر و يطول بي السهر فيسائلني
القمر يا حلوة ما الخبر فأجيبه و القلب قد تيمه الحب يا بدر أنا السبب أحببت بلا
أمل بدات الشمس كتشرق. وقفت كنتأمل. شنو الفرق بين الشروق والغروب؟ وعلاش الغروب
أجمل من الشروق؟_فاش كتفكري؟ _معرفتش. غير سهيت وصافي_علاش منعستيش؟_مقدرتش_حتى
أنا....بحالك_كاين شي جديد؟_لاوالو غير مع الوالدة وصافي والخدمة_الله يعاونك.
_أمين_لقيتي ديك البنت؟_لا.... اصلا ماقلبتش_وعلاش ماقلبتيش؟ شنو كنتي كدير هاد
الايام كاملين؟_كنت حاضيك_كيفاش؟_معرفتش شنو نقوليك. فالصراحة مبقيتش باغي ديك
البنت. اكتشفت
اكتشفت بلي كنبغيك انتي_كتفلا عليا؟_لا أبدا. بصح بغيت
ديك البنت لمدة طويلة. ولكن فاش بعدتي عليا عاد عرفت بقيمتك وعرفت بلي كانت عندك
بلاصة فقلبي وفاش مشيتي خليتيه خاوي ولات الدنيا كحلة بلا بيك. _لاميمكنش. لا انت
كتفلا عليا._مكنتفلاش. سكتي وسمعي شنو كنقول. راه كنبغيك. انتي هي حياتي. هاد
الايام كاملين دوزتهوم وانا تابعك. مكنقدرش ندوز شي نهار بلا بيك. انا ماكنتش حاس
شنو كتعنيلي ولكن البارح فالليل وانا فالغابة كنقلب عليك. كنقسمليك بلي كنت غنموت
بالخلعة._أمين. أنت جرحتيني بزاف وحتى دبا كتجرحني. _انا بصح جرحتك وكنت عدواني
معاك ولكن حيت كنت مخبل وخايف معارف راسي من رجلي. معارفش واش باغي نكمل حياتي مع
واحد الانسانة رائعة ولا نرجع لور نقلب على البنت اللي بغيت وانا صغير. معرفتش
كيفاش ولكن انا وليت انانية. حيت كيما كنتي انت الوحيد اللي دخل لقلبي كنت كنتمنى
نكون حتى انا الوحيدة فقلبك. ولكن صدقت مكنعنيلك والو او ربما حتى انا غير لاعبة
احتياط فحياتك_جهان نساي عافاك داكشي اللي داز. متعقديش الامور. مكانش بخاطري نبغي
ديك البنت. الوحدة هي اللي خلاتها ترجع لحياتي. لو انك انتي اعترفتي لي بلي
كتبغيني قبل مانمشي كون راني بغيتك حتى انا. وها انا مامشيتش نقلب عليها فمرة.
واختاريتكانتي. ماما كانت صادقة فاش قالت بلي حنا تخلقنا لبعضياتنا. يوقع اللي بغا
يوقع فالاخير غادين نكونو مع بعض. متقسحيش قلبك. انا غنمشي ونخليك تفكري على خاطرك
وانتي اللي تختاري. بسلامةمقدرتش نتحمل يطلق من يدي ويعطيني بالظهر ويمشي ويخليني
موراه. مقدرتش نطلق منو وبقيت شادة فيه. دار شاف فيا وابتسم
واخيرا رجعات ليا الابتسامة. وعاد فهمت المعنى ديال واحد
الحكمة كتقول السعادة كالفراشة. اذا تبعتها هربت منك واذا تجاهلتها رفرفت حولك. لو
اني بفيت تابعة أمين ومشاكلو ومقاتلة مع ديك الفكرة اللي فراسو كنت غير غنكبر
الموضوع ونخليه يكرهني اكثر. ولكن حيت بعدت وخليتلو المجال يبقى غير هو وديك
الفكرة بدات كتبانلو بلاصتي خاوية وعرف شحال من حاجة انا اللي كنت موفراها ماشي
ديك الفكرة اللي فراسو. واتاكد بلي كيبغيني انا. دبا خاسني نختار ردة الفعل
المناسبة لطلب الزواج حيت الاعتراف بالحب ماصدقش ومكانش شاعري كيما تمنيت. لا
بلاتي هاهو ولا شاعري كثر من القياس. فين غادي؟ هذا واش مغيطلبش مني الزواج؟ ولا
صافي حنا مخطوبين؟جرني ومشينا للدار. عاد قدرنا نعسو. داز النهار عادي كنا باغيين
نهبطو للشاطئ ولكن كان الموت ديال البرد. واجهنا البرد. لبسنا حوايج سخونين وهبطنا
للبحر شوية نتمشاو ونخليو المشاعر تكبر. بدا الحال كيظلام وبدينا كنقفقفو بالبرد.
شعل أمين العافية وقالي_حتى انا من حقي نجلس معاك هاد الجلسة الرومانسية_بطبيعة
الحال_جبتليك جوج حاجات. اللولة غتفرحك والثانية غتبكيك_وخا نبداو بلي تفرح حيت
ايلا بكيت مغنحسش بالفرحة من بعد.....شنو هي؟ وردة ييييييي ههه شكرا. والثانية؟
غتسافر؟ غترجع للخارج؟_لا مالكي كتنقزيجبد من جيبو علبة حمرا صغيرة وبطبيعة الحال
غير شفتها بديت كنبكي وهو بقا كيضحك عليا. _جهان! كنبغيك تزوجي بيا_ناري عمرني
تخيل هاد السيناريو_جاوبي دغيا راه مقادرش نصبر. راني كنشراف_هههه حتى انا كنبغيك.
موافقة_يالاه خليني نلبسك الخاتم_وهذا اللي فيدي شنو غندير بيه؟_لبسيهوم
بجوج_ميمكنش_غير لبسيه حتى لمن بعد ونشوفو كيفاش نديرولهوم
أحببتك مرتين الجزء الاخير
من بعد مدة تزوجنا. ومشينا سكنا فمدينة اخرى وولدت بنيتة
سميناها جانت. كبرات بنتي جنة وكبر معاها الحب ديالنا والحب ديالها.عشنا حياة
سعيدة كيما تمنينا ولكن من نهار دارت اربع سنوات وأمين مبدل. ولا واحد اخر. مبقاش
كيبغيني. ولا كيتتجنب ما امكن المواقف العاطفية. او ايلا تزير كنحس بيه غير
كينافقني وبلي غير مضطر على داكشي. واحد النهار قررت نعطيه وقت ونخليه يرتاح مني
شوية. وحتى انا نبعد حيت داكشي كيألمني. هزيت بنتي ومشيت لدارنا. منها يرتاح هو
ونرتاح حتى انا ونسترجع القوة ديالي شوية. فدارنا كنت فرحانة بزاف نشوف بنتي كتلعب
فين كنت كنلعب حتى انا ودير حتى هي البسالة وتعصب جدها وتحمقو. وترون لجداتها
الصالون وترونلي بيتي وتبقا حتى هي معلقة فالسرجم ومتبغيش تنعس. كانت نسخة طبق
الاصل ديالي. ماشدات والو من باها ههه .دوزت سيمانة زوينة مع دارنا ووصل الوقت باش
نرجع لداري ونشوف امين واش ارتاح ولا نشوف شنو ندير معاه. النهار اللي غنمشي بحالي
جات عندي ماما وعينيها فيهوم الدموع وهازة واحد الكسيوة. كانت ديالي فاش كنت فعمر
جنة.وشي تصاور قدام اول مرة نشوفهوم. فرحت بزاف وبقينا كنتعانقو ونبكيو. ونتعاودو
على الصغر او بنتي كتصنط وكتسجل التحرميات باش ديرهوم حتى هي. لبست الكسوة لبنتي
جات قدها ماما تخلعات حيت بحال ايلا انا اللي واقفة قدامها ورجعات للماضي بخمسة
وعشرين سنة. داك النهار كنا يالاه جينا لهاد المدينة وكنا كندورو وشراولي ديك
الكسوة. ومن بعد خبعات ماما التصاور وخبعات معاهوم الحوايج حتى توصل بنتي لهاد
العمر عاد توريهوملي باش تفرحني. تصافط مع دارنا ورجعت لمدينتي. حسيت بحال ايلا
داز بزاف ديال الوقت وتوحشتها بزاف. واكيد حتى امين توحشتو. ولكن كان مزيان نخليه
يرتاح مني شويةوصلت للدار بغيت نفتح مبغاش يدخل الساروت يعني أمين كاين فالدار.
صونيت وهو يفتح الباب. فتح البتب وهو مبتسم بغيت نسلم عليه ولكن سبقاتني بنتي
نقزات عليه. كون مكانتش بنتي كون نتفتها. عنقها وباسها. شوية وجهو تبدل و رجع حطها
فالارض وبقا كيشوف فيها . شدها من كتافها وبقا كيدورها وكيقيسلها فالكسوة_منين
جاتك هاد الكسوة_عطاتهالها ماما. علاش؟ _لا والو. غير جاني فشكل . راه الماكلة
فالكوزينة سيرو تاكلو. _مشينا تغدينا غير انا وبنتي وهو خرج العشية كاملة وهو برا
وانا اعصابي كتحرق حيت الراجل مزال كيما كان. مع السبعة دخل لقاني انا وبنتي
كنتفرجو .مشا للبيت وخلانا ماسلم علينا ما والو. جهدت صوت التلفزة وتبعتو وسديت
الباب._قولي شنو كاين؟_والو مكاينة حتى حاجة_مالك مبدل_قلتليك مماليش. مرضتيني
بهاد الاسئلة مالك مكتفهميش_لا كنفهم. انا سافرت حيت شفتك مبدل بزاف هاد الشهور
اللي دازو. صبرت وحاولت منتقلقش منك. ولكن انت غير زدتي فيه. بعدتي عليا ومبقيتيش
كتبغيني. وليتي بحال داك أمين اللي سمح فيا واحد النهار. واش باغي تسمح فيا مرة
أخرى؟_شنو كتخربقي!؟_وياكما لنفس السبب؟_شنو؟_رجعات ديك البنت لعقلك عاوتاني؟مبغاش
يجاوبني وبديت كنبكي. غير شافني كنبكي جا عنقني وبدا كيهدني_سمحيلي اجهان. ولكن
ماعندي ماندير. كلامك صحيح رجعت كنفكر فديك البنت. _مكتحشمش. وكتقولي فوجهي_انتي
سولتيني. ومبغيتش نكذب باش كولشي يكون واضح. انا بصح بغيتك ونسيتها. والله كنبغيك
ولكن فهاد المدة وليت متوتر بزاف. والسبب هو بنتنا. كتشبه ليها بزاف. مني دارت
اربع سنين ولات كتشبه ليها بطريقة غريبة. كيفاش بغيتيني نتصرف وانا فكل لحظة كنشوف
بنتي كنتفكر ديك البنت. انا ماشي رجعت كنبغيها ولكن متوتر حيت خايف نرجع نبغيها
مرة أخرى. واليوم عاوتاني كانت لابسة نفس الكسوة ديال ديك البنت. القدر خلا الام
ديالك تشري ديك الكسوة وتعطيهالك و تلبسيها لبنتك. شنو كيعني هادشي؟ راني خايف
ترجع تبان فحياتي. وداكشي باش خرجت باش نرتاح ونفكر شوية بعيد عليك باش متحسي
بوالو._واش متأكد بلي ديك الكسوة هي نفسها اللي كانت لابسة_كانت لابسة بحالها نيت
معرفتش واش نفسها_ههههه ميمكنش_علاش كضحكي. شنو اللي ميمكنش_ديك الكسوة راها ديالي
ملي كنت صغيرة_لا ميمكنش_بلاتي نجيبليك واحد التصويرة ديالي وانا صغيرة. عاد
لقيتهوم مع هاد الكسوة. كانت ماما مخبعاهومجبدت التصويرة ديالي وانا لابسة ديك
الكسوة نيت. شافها أمين بقا غير حال فمو وكيشوف وخرج للصالون كيشوف فالتصويرة وفيا.انتي هي ديك البنت اه انا _يعني انا
بغيتك جوج مرات؟! فالتصويرة وفجنة... النهاية
تأليف : حياة
