قصة الزواج المسحور

قصة الزواج المسحور

بواسطة:
الزواج المسحور

 
قصة  الزواج المسحور




 انا بدر ومشكلتي اني منعزل عن الجنس الاخر من صغري ماكانش عندي فضول اني نتعرف على البنات ولا
نتصاحب كانت حياتي عبارة عن عمل تطبيقي لتجسيد حلم الاب ديالي لي بغاني نطلع محامي لي كان كيصرف دم قلبو عليا واخا حنا متوسطين كان مهلي فيا والله يذكرو بالخير المهم قصتي بدات فالسنة ثانية جامعة كنت فالسيسطيم ديالي المعتاد من لافاك للدار نراجع شوية نمشي للكلوب ونرجع ندوش وننعس، هاكدا كانت حياتي ولي تمنيتها كون بقات هاكدا واخا الدراري صحابي كولشي مصاحب تقريبا انا معمرني فكرت فهاد الموضوع واخا كانو شي خيبوعات كيعطيو الإشارات وداكشي ههه المهم مابين هاد الخيبوعات كانت واحد البنت سميتها أمل وهاد أمل كانت كاتقرى معايا من السيزيام يعني 4سنين وكنت دايما كانتعجب كيفاش حتى باقا كاتقرا معايا وكانت دايما كاتبقا تشوف فيا وغير ساهية ولكن انا معمرني مافهمت راسي 4سنين وانا ولا كاين فهاد العالم كيفاش غادي نفهم وانا مقلوبة عليا القفة هه حتى قررات تعتارف ليا وبالفعل جات عندي مور واحد المحاضرة-أمل:السلام بدر لاباس -انا:لاباس الحمد لله ونتي -أمل:الحمد لله أجي كتبتي المحاضرة ديال ليوما -انا:بطبيعة الحال -امل:واخا تعطيها ليا نكتبها راه راسي كان كيضرني وماكتبتهاش -انا:واخا ولكن علاش تعدبي راسك ديري عليها بوليكوب وتهناي -امل:خاصني نقراها باش نكتبها ملخصة -انا:واخا ليبغيتي -أمل:يالاه نمشيو للكافيتيريا نكتب المحاضرة -انا:على بركة الله، مشينا للكافيتيريا وجلسنا -انا:هانتي أأمل ها هي المحاضرة -أمل:شوف أبدر أنا ماجبتكش هنا على قبل المحاضرة -أنا:كيفاش زعما -أمل:بدر أنا عارفاك واحد الولد لي حشومي وماعمرك عرفتي شي بنت فحياتك -انا:أنا ماشي حشومي أنا ماعنديش الوقت لهاد الخزعبلات -أمل:واش عمرك سولتي راسك علاش حنا الوحيدين لي بقينا كانقراو مع بعضنا من السيزيام -انا:ماعرفتش والصراحة تعجبت من هاد الصدفة أمل:ماتعجبش وهادي ماشي صدفة نتا كاتعجبني وأنا كنت كاندير انتقال كل عام باش نقرا معاك -انا:كيفاش كانعجبك لا سمحي ليا أختي أنا ماعنديش الوقت لهادشي بالمرة -أمل:بدر انا عارفاك متوتر دابا ولكن فهمني أنا جاو فيا الخطاب 4دلمرات وواليديا بداو كاتبزز عليا باش نقبل واحد السيد جا يخطبني -انا:الله يسهل عليك أختي ونتمنا ليك غير الخير ولكن انا ماشي دراسي -امل:فهمني انا قلبي متعلق بيك ومانقدرش نبعد عليك فهمني أبدر عافاك -انا:انا قلت ليك لي كاين اختي صافي ماتضغطيش عليا

الجزء الثاني :

أمل:لا مايمكنش تدير فيا هاكدا أبدر -انا:انا ماداير فيك والو أختي وكأنني ماسمعتش هاد الهضرة هادي والله يرحم الواليدين ماتتت...ماكملت الهضرة حتى جات فيا واحد التصرفيقة لي الصراحة بغيت نشدها نوري ليها التصرفيق ديال بصح كيداير ولكن شفت فعينيها واحد النظرات لي خلاوني نتسمر فبلاصتي والناس لي فالكافيتيريا كاملين كايخنززو فينا -أمل:شتي وماكنتي ليا والله لا كنتي لشي وحدة -انا:راكي زدتي فيه ماشي صبرنا ليك تصبنينا -أمل:والله حتى تجي لعندي تتمنى تتزوج بيا وديك الساعة تشوف(مشات بحالها)،وبقيت غير بوحدي فديك الكافيتيريا وكووولشي كايشوف فيا ههه انا ماعرفت كيف نفرغ الأعصاب لي كانو فيا فديك اللحظة وبقيت كانضحك (كانضحك على الناس لي كانو فالكافيتيريا حيت كانو فاهمين كولشي غلط انا ههه) وهاد الحدث كان أساسي فالقصة ديالي ومعمرني كنت كانفكر بلي دبصح غادي نرغب أمل باش تقبل عليا كيما قالتلي،المهم بلاش مانحرقو الفيلم كولشي بوقتو زين،ومن بعد هاداك الديكور أمل مابقاتش كاتبان فلافاك والصراحة بقا فيا الحال حيت كنت عارف بلي بسبابي هي قطعات الدراسة ديالها ولكن الله غالب آشندير،هي هاديك داز شي شهر هاكداك كنت ناعس حتى فقت مع 2دليل،فقت ووجهي فيه طبعات كوحل ويدي اليمنى محروقة من المرفق وكانت طبعة فالمارو فيديا بزوج والحلم كان مرعب وتخلعت ماديتهاش فحالتي ديك الساعة كنت كانفكر غير فداك الكابوس لي حلمت من خلالو أني كنت على علاقة بشي بنت وديك البنت ماشي طبيعية كانت سخونة بزاااف وأنا ماكنتش كانقيصها لخاطري بزز مني كانت الحركة ديالي لا إرادية كانحاول نتخلص من ديك القوة لي كانت كاتحكم فيا وبقيت كانقاوم حتى فقت وأنا باقي كانفكر فداك الحلم حتى سمعت صوت فودني 'كيف جيتك' انا الشعر دراسي وقف وبقيت غير كانغوت حتى جات فيا واحد التصرفيقة لي دوخاتني بالمعقول


الجزء الثالث:
فالبلاصة جاو عندي واليديا بزوج والواليد بقا كايقرا عليا فالقرآن والواليدة كذلك حتى رتاحيت وفالصباح فقت معطل شوية ولقيت واحد الفقيه فالدار جابو الواليد للدار يشول آش هادشي وقعليا ولكن داك الفقيه غير شافني بقا مكوانسي وملي عطيتو يدي السيد بحال إيلا ضربو حمار الليل كفض جلابتو وعلق هو يجري والواليد تابعو الحاصول وما فيه المعنويات ديالي نقصو بزااف وأول نهار غادي نغيب فشي محاضرة وموراها تعودت على الغياب حيت داك الحلم بقا كيتكرر مرارا حتى وليت كانحس براسي مراقب ولكن واحد الصوت حنيين فودني كان كيجيني فديك الايام وكيطلب مني منتخلعش ومانعرف لاش رتاحيت لداك الصوت يمكن حيت هو الحاجة الغريبة الوحيدة لي حسيتها معايا ماشي ضدي،ما علينا الواليد جاب واحد الفقيه كايقولو مجهد المهم شافني وشافلي يدي وقالي بلي انا مزوج من واحد الجنية أنا غير سمعت هاكاك وبغيت نحماق آااو أنا بنادمة وماقادش عليها عاد تجيبولي جنية وا الحكرة هادي،المهم الفقيه قالينا بلي هاديك الجنية ماشي مسلمة وزيد عليه هي بنت شي واحد مهم فالجن وعاد هاد النوع من السحر خاص الشخص المسحور يتزوج الشخص المذكور فالسحر وفالبلاصة عرفتها بلي هيا لي عملاتها آه أمل وشكون غيرها المهم انا قلبي ما هنانيش داك النهار وتسنيت الليل باش نفركع هاد الرمانة ونعست بكري المهم داكشي كان كيما توقعت نعست وحلمت نفس الحلمة وضرباتني الفيقة فنفس الوقت وبقيت كانستنا داك الصوت 'كيف جيتك أبدر' -انا:بغيت نهضر معاك باني ليا -'ياك شفتيني فالحلم آش بغيتي كثر نتوما فضوليين' -انا:واش نتي لي... -'اه انا لي تزوجتي بيها وكنتي كاتعاشرها فهاد الفترة' -انا:بانيلي باش نعرف نهضر معاك -'مانقدرش دابا وعرفتك اش بغيتي تقول وهاد الزواج ماعمرو غادي يسالي حتى يموت واحد فينا' -انا:انا ممزوج بحد وعارف كيفاش غادي نسالي هاد الزواج' ديك الساعة جات فيا واحد التصرفيقة باقي لحد الآن كنسمع صوتها مرة مرة فودني كانت قوية بزاف وخلاتني نغيب (مالاعبينش آاو لي جا يصرفقني هه) المهم فقت فالصباح ومشيت عند واحد صاحبي كان كايقرا معايا ساكن فالحومة ديال أمل اسمو عادل -انا:السلام عادل لاباس -عادل:اهلاان خويا بدر ببخير الحمد لله الله يبارك فيك -انا:اجي واش بصح أمل كاتسكن هنايا -عادل:لا راه سيمانا باش رحلو ولكن خلات عندي واحد النمرة ووصاتني ملي تجي نعطيهاليك -انا:آراها اخويا الله يحفضك
  

الجزء الرابع :

 المهم قيدت ديك النمرة ومشيت ديريكت لواحد الجردة جلست وصونيت على أمل -انا:الو السلام عليكم امل هادي -امل:آه وي شكون معايا -انا:معاك بدر بغيت نشوفك ضاروري -امل:هههه وعلاش بالسلامة -انا:حتى تجي ونهضرو انا كانتسناك فكافي المسيرة (قطعت الخط باش مانسمعش جوابها وتضطر تجي) وداكشي لي كان جات وكان الحوار ديالنا طويل -انا:عاى سلامتك -الله يسلمك -انا:علاش درتي فيا هادشي حشوما عليك -امل: ونتا ماحشوماش عليك لي صارحتك بالمشاعر ديالي وماديتيهاش فيا -انا:حتى دابا ماقلتي عيب أبنت الناس -امل:كيفاش ماقلت عيب -انا:انا مستعد نتزوج بيك دابا فوقاش نجي لداركوم -أمل:وشكون قاليك أنا قابلا هه -انا:كيفاش ماقابلاش واش عرفتي آش درتي فيا نتي خرجتي على حياتي ودابا كاتقولي ماباغاش (شديتها من يدها بجهد) ولكن مقدرتش نبقى شاد فيديها شفت فعينيها شي حاجة ماشي طبيعية واحد الوميض خلاني نتسمر فبلاصتي كانت واحد النظرات أقل ما يقال عنها أنها مرعبة كانت كاملا حقد وكراهية وبرودة كبيرة لدرجة خلاتني نتحاشا نشوف فيها مباشرة -أمل:ماتقدرش تتزوج بيا -انا:انا بغيت نتهنى من عذابي نتي بديتيه ونتي لي غادي تساليه -أمل:انا حذرتك راه عليا لعنة ونتا ماغاتتحملش العواقب ديالها -انا:اللعنة هي لي عندي أنا واش عرفتي شنو هي تتسناك كل ليلة جنية تعاشرها وبزز منك وملي تقيسها بحالا قستي العافية واش هادي ماشي لعنة وزيد عليها كاتجبرني نعاشرها فوضعيات شاذة وملي كانفيق كانلقا راسي كلي محروق راه مابقا ليا مانخبي عليك أنا بغيت نتهنى من هادشي ياك نتي كاتبغيني ساعديني ايلا كاتحسي بشي حاجة من جيهتي راه مابقيتش باقي غادي نستحمل (وقفت وعنقتها فالزنقة قدام الناس بغات تبعد مني ولكن مارخيتش منها لعل وعسى ترأف بيا وتبغي تساعدني)-امل:سير ضبر على الشهود -انا:(شديت التلفون واتصلت بالواليد طلبت منو يجي عند واحد العدول قريب هو الشهود معاه وهو فهمني فالبلاصة وحنا مشينا قدام الباب ديال الدار لي فيها العدول وبقينا كانتسناو) كنت فرحان كيفاس مانفرحش وانا غاندير الخطوة لي تخليني نتخلص من هاد العذاب بالمرة -امل:اتصل بباك قوليه يجي بزربة -انا:راه فالطريق نص ساعة ويجي ولكن نتي ماغاتقوليهاش لواليديك؟ -امل:ماسوقكش فيهوم وماعمرك تسولني على عائلتي فهمتي (واحد النظرة شافت فيا بيها مرعبة كانو عينيها حومر لدرجة أن ابيض العينين مابقاش) -انا:واخا ماغاتعاوديش تسمعي هاد الأسئلة مني (ماخبيت الخوف لي فقلبي غير بزز حسيت بيها ماشي طبيعية ولكن اللهم لعمش ولا لعما هي بلقليلة بنادم هه)


الجزء الخامس :

 هي هاديك جا الواليد وجاب الشهود معاه ودخلنا عند العدول كان كولشي طببعي حتى بدا العدول كايقرا القرآن حسيت بأمل مزيرة بزاف وبغات تخرج بحالها وبقيت كانصبر فيها حتى تكاتبنا وسالينا وديتها معايا للدار ديريكت،كان كايحساب ليا صافي الساعة هنا عاد غاتبدا المشاكيل غير زطمات برجلها فالدار حسيتبالدار تزعزعات واحد الإحساس بحالا جا الزلزال شديت غير فالحيط باش ماطحتش -الواليدة:على سلامتك أولدي (بقات كاتعنقنا وتبوس فينا يمكن بغات تحسسنا بالراحة شوية) -امل:(ماداتهاش فالوالدة) يالاه نمشيو للبيت -انا:يالاه نمشيو، ولكن غير دخلنا للبيت سمعت شي غوتة فشكل موراها جلسات أمل فةسط البيت وسط واحد الرسم خماسي رسماتو وبقات كاتقول شي كلام مامفهومش بقات هكاك شي نص ساعة وطلعات فوق الفراش وحيدات حوايجها، انا فهمت بلي خاصني نقيصها وداكشي لي كان عاشرتها وهي مارفضاتنيش قلت يمكن هادا غايكون شرط باش نتهنى من ديك الجنية لي حتى سميتها ماعارفهاش ولكن الغريب أن أمل كانت حاسة بالنشوة معايا وطلبات مني ننفذ شي حركات نفسها كانت ديك الجنية (ملحوظة:الإسم ديالها مانقدرش نكتبو ولكن نقدر نعطيها اسم آخر 'سينودرا')كاتجبرني نعملهوم معاها ولكن هاد المرة عملتهم وماشي رغبة فيها ولا هي عاجباني لاا انا كنت باغي نتهنى من هادشي صافي سالينا وقلبت وجهي بقيت كانستغفر ربي على داكشي لي درت حتى صوتي تخنق أمل حطات يديها على عنقي حتى كانحس بصباعها غايتقبو عنقي ماعرفتش منين عندها هاد القوة كاملة -امل:غادي تسكت حسنليك (وطلقات مني) -انا:ووواخا احم احم،وبقيت كانفكر باش تبليت عوتاني هاد الموصيبة لاصقة حدايا كيغايجيني النعاس، وفعلا بقيت كانتقلب فبلاصتي وماجاني النعاس حتى شحفت ولكن غير غمضت عيني حلمت ولكن ماكانتش نفس الحلمة هاد المرة حلمت براسي مالابس والو وجالس فنفس الفراش لي كانحلم راسي كانعاشر فيه سينودرا ولكن هاد المرة ماكناش بوحديتنا كانت أمل معانا فنفس الغرفة وكانت مقابلا مع سينودرا وكايشوفو فبعضهم بتحدي وبقيت مصدوم وسطهم كانت امل كاتقول شي هضرة مامفهوماش ماعرفتش المعنى ديالها واخا نطق الحروف عربي ولكن الكلمات ماشي باللغة العربية أما سينودرا كانت كاتكبر وكاتتحول لشي أشكال لي مهما وصفت ماغاتقدروش تتصوروها فبالكوم ولكن فجأة سينودرا بحالا اختفت ماعرفت فين مشات وبقيت مكوانسي كانحاول نفهم آش واقع واخا العقل باش نفكر مابقاش ليا حتى شداتني أمل من يدي وطلعاتني فوق داك الفراش لي كنت انا وسينودرا كنن... المهم ماقدرتش نقيسها كنت مصدوم من سينودرا الشكل ديالها باقي فبالي بحالا عقلي كان مخدر شوية وأمل اتخدت وضعية القرفصاء وانا بلى أدنى شعور بالجسد ديالي كنت كانعاشرها كنت كانتعجب من الجسد ديالي كيفاش كايتحرك بوحدو ماكنتش كانتحكم فيه بالمرة


الجزء السادس:

 عييت نقاوم وماقدرتش نتخلص من ديك القوة لي تملكاتني فديك اللحظة ولكن لساني كنت كانتحكم فيه كانعرف آش كانقول وفالبلاصة بديت كانقرا القرآن وشي 4دقايق من موراها ضرباتني الفيقة ونضت من بلاصتي وأنا كلي عرقان وأثر الحروق فيدي ووجهي فيه طبعات كوحل وغسلت وجهي ورجعت لبلاصتي ولكن لاحظت بلي أمل ماكايناش ماعرفتها فين مشات،بغيت ننعس ولكن ماجانيشر وكي يدير يجيني بعد لي شفتو،شفتها مامسلكاش نضت توضيت وصليت وشديت القرآن وبقيت كانقراه بالجهر حتى صبح الصباح صليت الفجر ورجعت تكيت فبلاصتي ولكن هاد المرة النعاس دغيا خطف عيني وأحلامي كانت عاديا.وغير فقت كنت عارف راسي لقيت الدوا دالحالة ديالي،فهمت بلي خصني نكون على طهارة وداكشي لي وليت نعمل دايما موضي والصلاة فوقتها والنوافل،الحاصول ومافيه حسيت بواحد الراحة نفسية يااااالله شحال زوينة تكون عاطي لربي حقو فالعبادة.ماننكرش انني فالأول ماكنتش كانعمل شي حاجة خايبة ولكن دايما كان بالي ماهانيش كنت كانتسنى الفرصة لي تجيني فين نبدى نتقرب من ربي هاكدا كانت طريقة التفكير ديالي ماكنتش كانفكر أن الصلاة تقدر تنظف القلب وتصفي الحقد لي تربى فقلبي،المهم بقيت هاكاك شي شهر حتى ولات حياتي عادية تقريبا مابقيتش كانحلم وأمل ماعرفتها فين زادت وحتى سينودرا ولكن مرة مرة كانحلم بواحد الظل كحل كايبقى يهددني،ولي قدرت نعرفو أنه من عائلة سينودرا لي وقعات ليها شي حاجة خايبة شي لي خلاه يتوعدني أنه ينتاقم مني،صحيح حسيت بنوع من الرهبة والهيبة منو ولكن ماخفتش حيت كنت حاس أن ربي بجنبي الشيء لي عطاني قوة نفسية وتوازن كبير مكني أني نسيطر على المشاعر ديالي، ودازت سيمانا آخرا وليت كانخرج وندخل عادي مع المحافظة على الصلاة في وقتها وكانو يالاه بداو الامتحانات، وليت داير سيسطيم آخر كانحفظ بليل وانا مخدم القرآن فالتلفزة حتى قدرت ندوز الإمتحانات كاملين على خير ولكن شي لي ماضربتلوش البال انا هو أمل كنت قضيت شي سخرة وجاي للدار حتى صونا تيليفوني -انا:الو السلام عليكم -الو السيد بدر رحال -انا:هو هادا شكون معايا -شوف اسيدي ماتخلعش راه لقينا مراتك فواحد الحالة صعيبة وهي دابا فمستشفى...-انا:قطعت وشيرت لطاكسي فلبلاصة داني لعين المكان ودخلت لقيت واحد الطبيب كايتسناني باش نسيني على ورقة تحمل مصاريف العملية ديال أمل،الورقة لي سنيت بلا ما فكرت فيها ولكن عرفت من بعد أن العملية غاتكلف 5دلميون،خوكوم زاااوي باقي كايقرا ولكن الواليد ماخصرليش الله يسمح لينا من الواليدين كان مخبي شي بركة وتسلف وقدر يكمل المبلغ ودارو ليها عملية على مستوي الرحم ديالها نجحات ليها وبقات يوماين فالسبيطار عاد خرجناها فالأول مابغاتش تمشي معانا ولكن استسلمات للأمر الواقع والصراحة انا ماعرفتش آش وصلها لهاديك الحالة ولكن الحمد لله لي ناضت بالسلامة


الجزء الأخير:

 ديناها للدار ولاحظت أنها كانت خايفة من المجية لدارنا ولكن بقينا كانطمنو فيها انا والواليد والواليدا حتى مشات معانا،كيفاش أمل لي كانت النظرات ديالها ماشي طبيعية وانا شخصيا كنت كانخاف منها ولات هاكدا دايرا كي شي قطيطة ودودة بالعكس تخاف من الشرجم إلى دفعو الريح هادشي كامل ضربتو عرض الحائط ملي قريت عليها شويا دالقرآن ماكانتش كاتتهرب من أنها تسمعو بالعكس كانت كاترتاح لبه وهادشي خلاني نفرح،المهم رجعنا للدار ودازو الأيام الأولى عاديين كانت أمل تشافات فيهم ولأول مرة غانسمع فيهم صوت أمل لي كنعرف أمل لي كانت كاتقرا معايا ونراجعو للإمتحانات مع بعضنا،طلبت منها أنها تبدى تصلي ومالقيتش مشكيل بالعكس هي كانت مستعدة ومتعطشة أنها تصلي وتقرا القرآن وفي ظرف أسبوع هي ولات كتفيقني نصليو الفجر جماعة فالدار الواليد وانا موراه شويا والواليدا مورايا وأمل حداها ونصليو كلنا حسيت بيها تبدلات كليا حتى حقي فيها مابغاتش تمنعني منو والصراحة أول مرة كانبغي نقيسها ومن قلبي وكانخدم كل أحاسيسي معاها،علاش لي مانتمتعش بمرتي وحنا مجموعين تحت رحمة الله، والصراحة مانسيتش داكشي لي داز عليا ولكن ربي كبير وداكشي لي خلاني نصلي جوج ركعات وكلت من خلالهم أمري لله وبالفعل تمكنت انني نعطيها حقها، لا لا عفوا أنا لي خديت حقي هاد المرة هه ودازت الأيام وكل نهار أمل كاتزيد نور على نور والصراحة ماكنتش متيق الهناء لي كنت عايش فيه ولكن كنت كانحرص يوميا على أنني نحمد ربي كثر وكثر وربي كايزيدني فرحة على فرحة الحمد لله وهاد الفرحة تجلات ماديا فواحد القمر عطاه لينا الله وسميناها هدى،وبطبيعة الحال كاتشبه لماماها المهم هي كاتقول كاتشبه ليا وأنا كانقول كاتشبه ليها وماعرفناها لمن كاتشبه ههه ماشي مهم لمن كاتشبه أصلا حنا بجوج زوينين هه شكار راسو ومراتو عاد داز من هنا هه.هدي هي حكايتي ونتمنا تكونو خديتو عبرة منها وأهم عبرة هي الصلااااة، عمود الدين بيها الواحد كايتعتابر مسلم،و كايحافظ بيها الشخص على الرابط لي بينو وبين الله سبحانه ،تيقو بيا راه ماكايكفيش تكون مزيان مع الناس ومع راسك خاصك تتوج الأخلاق ديالك بتاج الصلاة.باش حتى إلى تلاقيتي بشي واحد فالطريق وسقساك واش انت مسلم غاتجاوب وبكل افتخار 'نعم انا مسلم'

النهاية

إلا جعباتكم القصة خليو كومونتير لتشجيعنا على المزيد و شاركوها مع أصدقاكم